575/2022-2023

Khawzawl, 21st May, 2022: Vawiin khan Khawzawl Wildlife Division leh Sub-Headquarters YMA, Khawzawl tangkawpte buatsaihin Khawzawlah  International Day for Biological Diversity, 2022 pual hun chu Electric Veng YMA Hall-ah 'Building a shared future for all life' tih thupui hmanga neih a ni. He hun hi District Bawrhsap Pu C.C. Lalchhuangkima chuan khuallian niin a telpui a. YMA hruaitute leh Biodiversity Management Committee member-te hnena ramngaw leh nungcha humhalh pawimawhzia inzirtirna hun, 'Sensitization of YMA leaders/BMC members on Environment and Wildflife Conservation' tih thupui hmangin inzirtirna neih a ni.

Khuallian Pu C.C. Lalchhuangkima chuan mihringte, nungchate leh khualrel thilsiam dangte inbuktawk taka chenhona siam kawngah mihringten mawhphurhna nasa tak kan nei a ni, a ti a. Sava kah nasat avanga kan thlai thar chhuahten an tawrh mek thute a  tarlang bawk a. YMA member-te leh khawtlang mi tu pawhin khawvel boruak hrisel leh chenna tlak siam kawngah tihtheih an neih theuh thu a sawi bawk.

Chawhma lam hun hi Pu C.Lalhmingliana, Vice President, Sub Hqrs. YMA Khawzawl chuan kaihruaiin,  Pu Samson Thanruma, Divisional Forest Officer, Khawzawl Wildlife Division chuan 'Wildlife Protection Act, 1972, an overview in the context of Mizoram' tih thupui hmangin kalkhawmte hnenah zirtirna a pe a ni.

Chawhnu lamah Pu Rongura Hrahsel, MFS (Rtd) chuan, 'Issues and problems of Wildlife Conservation in Mizoram and role of NGO in conservation' tih thupui hmangin kalkhawmte hnenah zirtirna a pe a. Pu PC Lalchunglura, SP, Khawzawl District pawhin thuchah tha tak a sawi bawk a. He hunah hian Sub Headquarters YMA Khawzawl hnuaia Branch hrang hrang President leh Secretary bakah Biodiversity Management Committee member mi engemawzat an kalkhawm a ni.