4018/2024-2025

Khawzawl, dated 30th January 2025: Vawiin chawhma dar 11:00 khan Zaingen YMA Hall-ah Village Council inthlanpui 2025 a chanvo nei polling official te tan training neih a ni a, Khawzawl DC Pu K. Vanlalthiana khuallian niin hun a hmang.

Khuallian Pu K. Vanlalthiana chuan thu sawiin polling official training tura lo kal te chibai a buk a, training hlawk taka hmang turin duhsakna a hlan a ni. Thianghlim leh felfai taka vote chhiar zawh thlenga chanvo hlenchhuak turin a chah a, hriat tawh te pawh zir that leh inhuam chungin rilru inhawng taka training hmang turin a chah bawk a ni. Inthlanpuia chanvo nei tlakah sawrkarin a ruatte an ni tih hre reng turin a chah a, inthlanpui tluang taka hman a nih theih nan thawk ho tha turin a sawm bawk a ni.

He hun hi SDO (Sadar) Pu Suvigya S. Chandra, IAS chuan hun a kaihruai a. Election Officer Pu Timothy R. Lalhmangaiha leh SDC leh AERO (Asst. Electoral Registration Officer) ni bawk Pu Paul Rokima te'n training hi an kaihruai a. Form hrang hrang ziah fel dan tur te, State Election Commission (SEC) thuchhuak thar te, polling station a awm dan tur te, inthlan hma, inthlan ni leh inthlan zawhah mawhphurhna te leh thil tul dang zirtirna neih a ni.