Dated Khawzawl, the 12th September, 2020: Nimin September Ni 11,2020  khan Deputy Commissioner, Khawzawl District kaihhruaiin DC Conference Hall-ah meeting pawimawh tak tak pathum neih a ni.

Chawhma dar 11 ah Khawzawl District chhunga Thlasik thlai chin thin chu hlawk zawka kalpui chhunzawm dan tur ngaihtuahin Horticulture, Agriculture, Forest leh KVK atanga Officer-te bakah, Khawzawl leh a chhehvela leilet nei pawl heng - Tuisenphai zau, Tuifar zau, Phaitha zau leh Chawngtlai-a Farmers Society/Association aiawhte nen meeting neih a ni. Meeting-ah hian kuthnathawktu pawl hrang hrang te'n kum kalta-a thlasik thlai an chin tawh dan leh an hlawkpui dante, hmasawn theihna lai ni a an hriatte report an pe a. Line Department Officer-te nen sawiho niin, thlai chingtute tana hlawk zawk leh chhawrnahawm zawk a nih theih nana hmalak dan turte sawiho a ni.

Chawhnu dar 1:30 ah Khawzawl District chhunga Covid-19 hrileng dona atana zone hrang hranga Incident Commander/Zonal Officer-te Bawrhsap in meeting a  neihpui leha, Incident Commander-te chuan an duty dan report kimchang pein, Covid-19 hri pung zel laka inven leh hmachhawn dan turte ngaihtuah ho a ni. Bawrhsap chuan Incident Commander-te chu thahnemngai taka thawk chhunzawm a, report a rawn luh hun chauh nghak lo a hmala thuai thuai thin turin a fuih thar bawk.

Nimin vek chawhnu dar 3 khan Khawzawl Town chhunga Village Council President tharte chu Bawrhsap Pu Zothanmawia chuan  inkawmkhawmna hun a neihpui leh a ni. He hunah hian DC chuan khawtlang leh district hmasawn nan a lungrual taka thawhpuiah VCP te chu a sawm a. VCP an nih mai piahlamah VLTF Chairman leh Village Level Disaster Management Committee (VLDMC) Chairman an nihna anga an thuneihna leh mawhphurhna hrang hrangte sawiho niin, Covid-19 hripui dona kawnga thawhho dan turte thahnemngai taka sawiho a ni bawk.