No.5006/2020-2021

Dated Serchhip, the 12th September, 2020:  Vawiin hian Serchhip DC Conference Hall ah National Food Security Day, 2020 lawmna inkhawm buatsaih a ni a, Serchhip Bawrhsap Pu Kumar Abhishek, IAS chu khuallian a ni.

Pu Kumar Abhishek chuan, India khua leh tui tumah chhuanchham leh riltama an awm lohna tura hmalakna dan pawimawh Food Security Act kan nei hi kan vannei hle a. Naupiang hlim atanga kan dam chhung zawng ei tur tlakchham hlauhthawn awm lohva min nun tir hi he Act hian a tum ber a ni, a ti. Tun hnaia hmalakna thar One Nation One Ration Card system pawh hi mitin mamawh thil a ni a, kan state a hnathawka rawn awm state pawn mite tan a tangkai hle dawn a, chutiang bawkin kan state mi leh sa state pawna awm te pawhin an hmang tangkai ang. He hmalakna hi kan district ah tha taka a hlawhtlin theih nan theih tawp kan chhuah tlan a tha a ni, a ti a. Adhaar leh Ration Card thlunzawm kal mek pawh  zaa za hlawhtling thei tura kan beih a tul thu a sawi a ni. Bawrhsap hian Serchhip District Adhaar Enrolment Centre thawktu pahnih chauh awm thin pawh dah belh a nih tur thu a tarlang bawk.

He hunah hian Pu J. Zomuansanga, Inspector chuan National Food Security Act, 2013 leh Targetted Pubic Distributiuon System kalpui mek dan te, One Nation One Ration Card System kal pui mek dan chipchiar taka sawifiahna (power presentation) a nei a. Adhaar thlunzawm hnathawh mekah district ah za zela 30 vel zawh a nih tawh thu te, One Nation One Ration Card kalpui bul tan nan Internet  signal nei thaa an ngaih Fair Price Shop pasarih (7) chu a thawh khat nana thuneitu sang zawka thehluh a nih tawh thute a tarlang a ni. 

District Consumer Union Secretary Pu Laldinpuia leh Serchhip Town VC Jt. Committee aiawh Pu C. Vanlalsiamthar, VCP, Serchhip VIII te pawhin thusawina an nei a ni.

He hun hi Pu C. Zadailova, DCSO chuan a kaihruaia. Chairman hian Serchhip chu Aizawl tih lohva Digital Weigh Bridge nei awm chhun a nih thu a sawi a. Consumer Union, VC leh tlawmngai pawl hrang hrang te nena inhnaih leh inpawh taka hna an thawh thin thute tarlangin, thawh hona tha tak nei zel turin a sawm a ni.

Serchhip a National Food Security Dat, 2020 hmanna hi Pu Lalmuansanga Ralte, Addl. DC, Pu Vishal Sah, IAS, Pi C. Lalduhzuali, SDO Sadar bakah Serchhipa NGOs aiawhte, Coordination hruaitute, VC te, Consumer's Union hruaitute, media mite leh Food, Civil Supplies & Consumers' Affairs thawktute an tel a ni.