224/2025-2026

Khawzawl, dated 17th April 2025: Vawiin chawhnu dar 2 khan District Information & Public Relations Officer (DIPRO) Pu Lalzara chuan a office-ah Information & Public Relations (I&PR) department siam Press Accreditation Card chu Accredited Journalist hnenah a hlan a ni.

He hunah hian DIPRO Pu Lalzara chuan Khawzawl District chhunga thuthar thehdarh kawnga hma latu mi pathum ten Press Accreditation Card an dawng thei chu a lawmpui thu sawiin ram leh khawtlang tana hna an thawhna kawngah theih tawp chhuah thar leh turin a fuih a. Hriselna tha tak chang chhunzawm zel tura duhsakna hlanin Accreditation Card chu Journalist-te henah hian a sem chhuak nghal a ni.

Press Accreditation hi mi pathum - Pu Lalrotluanga Ralte, Editor, Khawzawl Times; Pu Vanlalzawna Ralte, Stringer, DDK leh Pi Lalthlamuani Ralte, Editor, SI*AR Daily Newspaper te'n an dawng a ni.