225/2025-2026

Lunglei, 2025 Ṭau thla ni 17: Tunlaia Mizoram state ṭhenawm Manipur-a ui â hri (rabies) leng mek chu a kai leh thihpui an awm tak nual avangin Lunglei District chhunga ui vulhte leh mipuite he hri laka an him tlan theih nan vawiin khan Lunglei District Magistrate Pi Navneet Mann chuan Section 163, Bharatiya Nagarik Suraksha Sanhita (BNSS), 2023 tlawh chhanin Lunglei District mipuite zawm turin a hnuaia thupek hi a chhuah.

"1. Ui vulhtu zawng zawngte'n an ui vulhte ui â hri danna (anti rabies vaccine) an pe vek tur a ni.

"2. Lunglei District chhungah ram dang emaw, state dang aṭangin ui leh a sa lak luh khap tlat a ni.

"3. A vulhtu tel lovin khawlaiah zalen takin tu mahin ui an vah chhuahtir mai mai tur a ni lo va, khawlaiah ui an vah chhuahpui pawhin hrui (leash/chain) hmanga kaih ngei ngei tur a ni. Tin, an zun leh ek khawlaiah an hnutchhiah mai mai tur a ni lo.

"4. Ui damlo emaw, ui â hri (rabies) natna vei nia rinhlelhte chu rang takin District Veterinary Hospital emaw, Veterinary Dispensary emaw, Rural Animal Health Centre (RAH Centre) panpui vat tur a ni.

"5. Uiin mi a seh a nih chuan a sehtu ui chu ui â hri danna (anti rabies vaccine) la tawh a nih pawhin a rang thei ang berin damdawi in panpui vat tur a ni.

"6. Uiin mi a seh emaw, mihring nunna atana hlauhawm khawpa a awm a nih chuan Section 291, Bharatiya Nyaya Sanhita (BNS), 2023-in a tar lan angin ui vulhtu chu thla ruk (6) thleng lung in tan emaw, ₹ 5,000/- thleng chawitir emaw, a kawpin hremna hi pek theih a ni.

"He thupek hian thu leh awm hma chu chhuah a nih aṭanga thla (2) chhung a huam ang a, thupek zawm lote chu Section 223, Bharatiya Nyaya Sanhita (BNS), 2023 hmangin hrem theih an ni."