1955/2022-2023
Khawzawl 16th September, 2022: Vawiin chawhma dar 11:00 khan Krishi Vigyan Kendra (KVK), Khawzawl bultumin chhungkaw tinten mamawh ang chaw tha an ei theihna tura chuktuah huan siam pawimawhna leh thing phun pawimawhna inhrilhhriatna, 'National campaign on Poshan Abhiyaan & Tree Plantation Programme' buatsaih a ni. He hun hi Khawzawl Child Development Project Officer (CDPO) Pi Lalremthangi chuan khuallian niin a hmanpui a ni. 'National campaign on Poshan Abhiyaan & Tree Plantation Programme' hi naktuk a hman tura ruahman a ni a, naktuk hi holiday a nih avangin vawiinah hman a ni ta zawk a ni.

KVK Farmers Training Hall-a National Campaign on Poshan Abhiyaan & Tree Plantation Programme buatsaih hi KVK Head & Senior Scientist Dr. Henry Saplalrinliana'n a kaihruai a. Khuallian CDPO Pi Lalremthangi chuan mihringte hriselna atana chaw tha ei a pawimawhzia sawiin, a bik takin nu naupai laiin chaw tha an mamawh ang an ei hian naute lo piang tur taksa leh rilru hmasawn zelna turah nasa takin kawngro a su a ni, a ti a. KVK Khawzawlin chaw tha pawimawhna inhrilhhriatna leh thlai chin leh enkawl dan inzirtirna hun an buatsaih chu lawmawm a tih thu sawiin, Poshan Abhiyan Programme tluang tak leh hlawk tak hman a nih theih nan kalkhawmte chu duhsakna a hlan nghal a ni.

Chhungkaw tinten mamawh ang chaw tha an ei theihna tura chuktuah huan siam pawimawhna leh thing phun pawimawhna inhrilhhriatna vawiina buatsaihah hian Dr. Henry Saplalrinliana pawhin thu sawiin, tunlai thiamna hmanga siam chaw leh thlai chi hrang hrangte mihring hriselna atan an pawimawh thu leh taksa mamawh ang chaw tha kan ei theihna tur hian mitinte kan pawimawh a ni, a ti bawk.

He hunah hian KVK Programme Assistant (Home Science) Pi Lalhruaitluangi'n Nutri-Garden leh Nutri-Cereals pawimawhna leh tangkainate a sawi bawk.

Hun hman zawh hian Khuallian CDPO Pi Lalremthangi chuan KVK Compound-ah programme pual hian thing a phun a, hemi hnu hian he huna tel Anganwadi Workers leh kuthnathawktute hnenah a thlawnin Thlai chi sem chhuah a ni.

Vawiin programme-ah hian Anganwadi Workers leh kuthnathawktute, an vaiin mi 43 an tel thei a ni.