1954/2022-2023
Mimkut thla ni 16, 2022: Lawngtlai District chhunga zirna tihhmasawn nana Lawngtlai Bawrhsap Pu Amol Srivastava leh a officer-te hma laknaa "Adopt a School" project kalpui tur chu vawiin khan Lawngtlai DC Conference Hall-ah a hawnna hun hman a ni.
He hunah hian District Administration official-te bakah, Education Department lama thawktu sawm bikte an tel a. He project hawngtu Lawngtlai Bawrhsap Pu Amol Srivastava chuan sikul mal leh education department aṭanga hma lak theih bak piah lamah District Administration aṭanga hma lakpui ngai thil a awm ṭhin tih sawiin, "Adopt a School" project chu sikulin harsatna an tawh leh an mamawh te, zirna tihhmasawn nana thil ṭul hrang hrang hriatpui a, chin felsak leh an mamawh anga kaihhruaina, thurawn leh ṭanpuina pek theih nana ruahman a nih thu a sawi a. Project enchhinna atan District Administration officer-te'n an kalpui phawt tur thu sawiin, sikul hmanrua leh bungraw lama changkanna ringawt aiin, zirna boruak ṭha leh thiamna tak tak a awm theih nan a bulṭhut aṭanga a tahtawla hma lak chhoh a nih tur thu a sawi.
He hunah hian sikul adopt tur officer-te'n project kalpui an tum dan an sawi a. Education Department aṭanga official kalte'n project kalpui dan tura rawtna leh ngaih pawimawh zawng an neih te tar langin, sawi hona hun hman a ni bawk.
He project bul ṭan nan hian District Administration aṭanga official 8 (DRDA Project Director, Additional DC, Election Officer, SDO (Sadar), SDC, BDO Lawngtlai, Superintendent leh SDC) te'n Lawngtlai khawpui chhunga zirna in (primary school aṭanga higher secondary school thlengin) vil tur 3 ṭheuh an adopt a. He'ng an school adopt-ahte hian zirna kawnga hma an sawn theih nan zirna ina hotu lute leh education department hotute nen thawk hovin a ṭul anga ngaihven, en zui leh kaihhruaina pek a ni dawn a ni.
He'ng zirna in an thlan bikte ngaihven leh vil zuina turah hian he'ng kawng - faina chungchang te; hmanrua leh bungrua an neih ṭhat dan te; tui thianghlim leh faina leh thianghlimna atana mamawh an neih dan te; chawchhun dinhmun te; zirna leh thiamna lam te; ruihhlo, HIV, nun dan mawi leh eizawnna chungchang zirtirna pek te; zirtirtu leh zirlaite'n sikul an kal ṭhat dan te chu thlur bing tura tih a ni.
Attachment
- Loading attachment...
