3194/2024-2025

Khawzawl, dated 26th November 2024: Vawiin chawhma dar 11:00 a.m khan Electric Veng YMA Hall-ah Prime Minister Dharti Aaba Janjatiya Gram Utkarsh Abhiyan (PM DAJGUA) IEC Campaign November ni 15 atanga neih tan chu khar a ni a, Khawzawl DC, Pu K. Vanlalthiana chu khuallian a ni.

He hunah hian khuallian Pu K. Vanlalthiana chuan thu sawiin DAJGUA scheme hi scheme pawimawh tak, scheme hrang hrang indaihlohna te phuhruk thei tu tur a ni tih a sawi a, lo kal khawm te chungah an lo tel avanga lawmthu sawiin he scheme pawimawh tak hi a hlawhtlin ngei theih nan thawhhona leh tanrualna tha tak neih pui theih turin a sawm bawk a ni. He scheme hian Khawzawl district tana malsawmna leh hmasawnna a thlen ngei theih a beisei tlat thu a sawi a, mipui zawng zawng hnenah duhsakna a hlan bawk a ni. Thu a sawi zawh hian khuallian Pu K. Vanlalthiana chuan DAJGUA puala huaihawt Essay Writing leh Drawing Competition a titha zual te hnenah lawmman a sem nghal bawk a ni.

He hun hi Addl. DC, Pu Lalfakzuala'n chairman niin a kaihruai a, SDO (Sadar) Pu Suvigya S. Chandra, IAS chuan DAJGUA chungchang sawifiahna leh inhrilhhriatna (sensitization) hun a hmang bawk. Pu Samuel Vanlalpeka hnen atangin zai ngaihthlak a ni a, Sahlam Cultural Club, Chawngtlai te'n Mizo hnam lam an entir bawk. DIPRO Pu Lalzara'n vote of thanks sawiin hun a khar a ni.

He hunah hian Khawzawl office hrang hrang hotute, Khawzawl Higher Secondary School naupang te, YMA te, MHIP leh MUP member te an rawn tel a ni.