3193/2024-2025

Aizawl, the 26^th November 2024 : Tukin zing dar 7:30 a.m. khan Transport Minister Pu Vanlalhlana chuan Zoram Drivers’ Union in karkhat awh tur (26^th Nov – 3^rd Dec) Road Safety Week Lirthei Khalh Fimkhurna Hapta an huaihawt chu a hawng a. Kumtin Mizoram pumah Zoram Drivers’ Union (ZDU) in he Hapta hi an kalpui thin a ni.

Hapta hawnna inkhawm tawite ZDU Office Kawt, Sairang Road, Bawngkawn ah neih ani a, Transport Minister Pu Vanlalhlana chuan Road Safety Week kan hman tur hi mipuite hnena fimkhur ngaihna te, an himna tur te hriattir nawnna hun a ni dawn a. Lirthei hi mihring tan a pawimawh si a, a khalhtute fimkhur loh vang emaw puitlin tawk loh avang hian chhungkaw tam takin vanduaina, thihna hial te an tawh phah thin a. Chuvangin  mi zawng zawng tan he hun hi a thara ngaihpawimawh a tul hle a ni, a ti a. Road Safety kan tih hian lirthei khaltute tan chauha ngaihna a awm thin a. Kawngpui hmangtu zawng zawng – driver, passenger leh ke a kal thin te a huam vek a ni tih hre thar ang u tiin mipuite a chah a ni.

Minister chuan kawngpui kan hmanlaia kan rilru kan lak pen zeuh avangte, hun reilote kan nghah theih loh avanga damchhung atan vanduaina tawk ta emaw nunna chan an awm phah fo a. Sawrkarin infrastructure tha zawk lo siamin, dan tharte duangin a lekkawh lamah tan la mahse, kawngpui hmangtuten an thlawp si loh chuan, him zawk tura kan hmalaknate hian awmzia a nei thui lo a ni. Chuvangin, kan thil tih te hian keimah chauh ni lo, midang, mi chhungkua thlengin thui tak a nghawng thei a ni. Kangmei chhuak leh lirnghing a lo thlen thulha kan inpuahchah ang bawk hian a khat tawka hetiang awareness leh Hapta neih hi a tangkai hle a ni, a ti.

Kumina Road Safety Week thupui atan hian Fimkhur la, nun Chhanhim rawh tih hman niin lirthei khalh fimkhurna hapta hmantan hawnna inkhawm hi Zoram Drivers Union President F Dosang'an a kaihruai a. Fimkhurna Hapta hawnna inkhawm ah hian Transport Department leh Aizawl Traffic Police aiawhte bakah lirthei Association hrang hrang hruaitute an tel a ni.