3195/2024-2025

Dated Serchhip, the 26^th November, 2024: Vawiin khan Serchhip DC Pu Paul L.Khuma hoin Serchhip DC Pisapui Hall ah PM-DAJGUA Consultative Meeting neih a ni.  Serchhip District chhunga Head of Office zawng zawng te, khawtlang hruaitute leh mipuite he hunah hian an tel a. Department panga (5) thlur bingin mipui chhawr tangkai theih tur scheme sawifiahna hun an hmang a ni.

DC chuan thawhhona tha neih a pawimawhzia sawiin office mal emaw, pawl mal chauhin a hlenchhuah theih loh hi thawhhona tha a awm chuan theih loh a awm lo, a ti. Serchhip District chhungah sawrkar office hrang hrang ten scheme tam tak an kalpui mek a, heng scheme an kalpui danah duhkhawp lohna emaw fel hlel emaw a awm em tih kan enho a nga, department hrang hrangte chakna lakhawmin a fel hlel laite siam thain kan hnawhkhat dawn a ni, Pu Paul L Khuma chuan a ti a. Tribal te tana hmasawnna tur ruahmanna Development Action Plan for Scheduled Tribes (DAPST) siam tur a nih thu sawilangin “Serchhip mipuiten kan mamawhna zawn takah zel he plan hi kan siam theih nan i tang tlang ang u” tiin kalkhawmte a sawm a ni.

Vawiinah hian Department panga - Health & Family Welfare, Rural Development, Social Welfare leh DC Office hnuaia mipui hamthatna scheme dawn theih te sawifiah a ni a. DRDA Project Director Dr Malsawmtluanga Fanchun chuan RD hnuaia scheme hrang hrang a sawi zingah ni za inhlawhna, in sak tanpuina, thingtlang thalaite tana a thlawna training leh lo neitute tana hamthatna dawn theih te a sawi a ni.

District Medical Superintendent Dr ZD Lalmuanawma pawhin nu nau pai leh damdawi ina naute neite tana hamthatna dawn theih te, golden card chungchang te, naupaite tan a thlawna inentir theihna scheme te a sawifiah a. District Fisheries Development Officer Pu Lalmalsawma chuan sangha dil neitute leh neih tum te tana tanpuina dawn theih PMMSY chungchang a sawi a ni.

Deputy Commissioner Office aiawhin SDO (Sadar) Pi F Lalnisai chuan DC Office hnuaia mipui mamawh certificate hrang hrang awlsam taka dil dan te leh an office kaltlanga mipui mamawh hmasawnna hna an thawh dan a sawi a. Social Welfare Department aiawhin Pu Thanpuia’n thu sawiin tar pension chungchang te, hmeithai pension chungchang te, rualbanlote tana hamthatna chi hrang hrang te, hna hmu lote tana sawrkar atanga tanpuina dawn theih te a sawifiah bawk.

Sawihona hun hman chhunzawm nghal niin khawtlang hruaituten scheme hrang hrang an hriat duh te an zawt a. Serchhip District chhunga mipuite hamthatna tur scheme leh programme awm zawng zawngte hrilhfiahna leh a dil dan tur kimchang inziahna lehkhabu sem nghal a ni bawk.

Vawiin programme hi Additional DC Pu Lalrinzuala’n a kaihruai a ni.