3196/2024-2025

Dated Serchhip, the 26^th November, 2024: Vawiin khan Serchhip Bazarah Serchhip DC Pu Paul L.Khuma chuan Zoram Drivers Union Sub Headquarters Serchhip buatsaih Road Safety Week a hawng.

DC chuan nunna hi a hlu a, fimkhur loh vangin keimahni leh mi dang nunna kan la thei tih hriain lirthei khalh thin zawng zawng te chu dan zawm chunga, fimkhur taka khalh thin turin a chah a. Lirthei hi tangkai taka kan hman tura siam, kan thlen tumna hmunah rang taka min thlentu, awlsamna siamtu a ni a, a khalhtute kan fimkhur loh erawh chuan thil tihbaiawmah kan siam thei a ni, a ti. Road accident thlentu tam ber chu speed san lutuk vang te, rui chunga lirthei khalh vang te, helmet khum loa 2-wheeler khalh vang te, mobile khawih chunga lirthei khalh vang te a ni a; heng hi a hlauhawmzia inzirtir a, fimkhur taka lirthei khalh inzirtir a tul a ni, a ti bawk.

Pu Paul L.Khuma chuan road accident vanga ni tina nunna hlu tak chan an tamzia a sawi a.  Himna hapta ‘Road safety week’ hman hi a tul a, a pawimawh tak zet a ni, a ti a. “Himna hapta hi kar khat leka raltir mai loin, motor khalhtute thinlungah motor khalh fimkhur a tulzia i tuh ang u”, tiin kalkhawmte a fuih a ni.

ZDU Serchhip Sub-Headquarters te hi Road Safety Week hman chhungin ni tin an duty dawn a. ZDU te buatsaih ‘Motor accident pumpelh theih nana driver leh mipuite hnena ngenna’ pamphlet an sem a. Ruihhlo ngaite leh an member puite chhawmdawl nan  lirtheia tar tur flag an zuar chhuak nghal bawk a ni.

Vawiin programme hi ZDU Serchhip Sub-Headquarters  President Pu H.Malsawma’n a kaihruai a ni.