50/2025-2026

Khawzawl, dated 4th April 2025: Vawiin chawhma dar 11 khan Zuchhip Branch YMA Hall-ah farmer te tan Sustainable Livelihood through Ericulture in East Mizoram under Silk Samagra-2 hnuaiah training an buatsaih a, District Sericulture Officer Pi K. Lallawmzuali chairperson niin hun a kaihruai a, Pu B. Lalchhuana, Deputy Director (DD), Sericulture Department leh Dr. Lalthlamuana Pachuau, Scientist D REC, CSB Mizoram sawm bik niin hun an hmang bawk.

Chairperson Pi K. Lallawmzuali chuan mi sawm bik te leh mipui kalkhawm te a lo lawm a, sawm bik te hnenah thilpek hlan nghal a ni. Hemi zawh hian training chu tan a ni a, hun khatna leh hun hnihnaah then a ni. Hun khatna training tan turin Pu B. Lalchhuana, DD chuan Sustainable Livelihood through Ericulture in East Mizoram under Silk Samagra-2 hnuaia project kal dan leh hma lak zel dan tur te a sawi a, ericulture lama hmalakna hi farmer te tan leh mipui te tan a hlawkthlak dawn em em a ni tih a sawi. DSO Pi K. Lallawmzuali chuan project thil tum te, tanpuina an dawnna te, hna an thawh tawh leh thawh mek te, cocoon tharah target an thlen tawh chin te a sawi a, Khawzawl district a farmer te kum tin target pha tura tan la zel turin a fuih bawk a ni. Dr. Lalthlamuana Pachuau chuan sericulture hnuaia tha zawka hna thawh dan leh hlawk zawka inzawrh theih dan tur chungchangah zirtirna a pe bawk a ni.

Hun hnihnaah hian Pu H.T Zothanmawia, Demonstrator chuan host plant cultivation chungchangah zirtirna a pe a, Pi Malsawmdawngi, Demonstrator chuan disinfection and hygiene chungchangah zirtirna a pe a, Pi Ramhlimawmi Hmar, Sericulture Extension Officer chuan Eri rearing technology chungchangah zirtirna a pe a ni. Farmer te nen inkawmna hun hman chhunzawm a ni a, zawhna an neih ang ang te chhan a ni bawk. Hemi zawh hian training chu khar a ni.