49/2025-2026
Aizawl dated 4th April 2025: Tukin khan Pu K.Sapdanga, Minister, Urban Development & Poverty Alleviation Department chuan Damdawi in, mihring leh ran hriselna enkawlna Clinic atanga chhuak bawlhhlawh sawngbawl bik ngai chi, Bio-medical Waste him zawk a sawngbawlna tur ‘Common Bio-medical Waste Treatment Facility, Tuirial’ chu a tak a hman tan a nih theih nan Bio-medical Waste Collection Van panga a vailiam a. He hun ah hian Pu Lalmalsawma Pachuau, Secretary, UD&PA, Pu C.C.Lalchhuangkima, Chief Executive Officer, Aizawl Smart City Ltd., Aizawl Municipal Coorporation leh Mizoram Pollution Control Board-a thawktute an tel a ni.

UD&PA Minister Pu K.Sapdanga chuan India hmarchhak State-a a pahnihna ni turin, mihring hriselna nasa tak a nghawng thei, bawlhhlawh sawngbawl bik ngai, Bio-medical Waste him zawk a sawngbawlna hmun,’Common Bio-medical Waste Treatment Facility’ Tuirial, a taka hman tan theih tur a peihfel a ni chu lawmawm a tih thu a sawi a. Bio-Medical Waste Management Rules 2016-in a phut angin Dawmdawi in leh damdawi lam kaihhnawi bawlhhlawhte chu he hmun ah hian sawngbawl tur a nih thu tarlangin, a hmahruai atan Aizawl khawpui chhung leh Saitual district-a damdawi in leh Clinic-te tuam hmasak a nih tur thu a sawi. Minister chuan bawlhhlawh sawngbawl hautak leh fimkhur ngai tak sawngbawlna hmun, a taka hman tur a peihfel a ni chu a hmang tangkaitu tur Damdawi in leh Clinic-te tan thu lawmawm tak a nih thu sawiin bawlhhlawh lakkhawm leh sawngbawlna senso chawi ngai te pawh thinlung inhawng tak chunga zawm a pawimawh thu a sawi a. He hmalakna hian khawtlang hriselna kawngah hmasawnna thui tak a thlen ngei a beisei thu a sawi.

Pu C.C.Lalchhuangkima, CEO, Aizawl Smart City Ltd. tarlan danin March ni 27, 2025 khan ‘Common Bio-medical Waste Treatment Facility’ hman dan tur chungchangah Damdawi in leh Clinic enkawltute hnen ah zirtirna buatsaih a ni tawh a. Tun a Damdawi in leh Clinic-te bak ah hian Veterinary Hospital leh Veterinary Clinic-te pawh tuam belh zel tum a nih thu a sawi. Bio-medical Waste Collection Van-te hian Bio-medical waste khawnin Hospital-te hi nitin an tlawh ang a, Clinics-te erawh kar khatah vawi hnih an tlawh thung ang. Bio-Medical Waste-te hi chi hrang hranga then hran a nih thu Pu C.C.Lalchhuangkima chuan sawiin chungte chu Polythene ip eng, sen, pawl leh a var te an ni a. Bio-medical Waste Treatment Facility awmze nei leh sawt taka kalpui a nih theih nan bawlhhlawhte chu a nih dan tur ang taka thliar hran a pawimawh thu a sawi.

‘Common Bio-medical Waste Treatment Facility’ hi BL Engineering – GI Infotech – Bioclean Joint Venture Firm-in an enkawl a. He facility chhungah hian Incinerator, Shredding machine, Autoclave Unit leh Effluent treatment plant a awm a ni. Thawktute tarlan danin darkar khatah he facility-ah hian Bio-medical waste kg 100 sawngbawl theih niin ni khatah Bio-medical Yellow Waste kg 700 sawngbawl thei tur a ngaih a ni bawk. Bawlhhlawh lakkhawmna tur, Bio-Medical Waste Collection Vehicle 10 ruahman niin heng van hmang a lakkhawm bawlhhlawh ip te chu Quick Response Code (QR Code) hmang a chhinchhiah vek a ni a, lirthei chetvelna thlithlai theihna tur, Global Positioning System (GPS)  vuah vek a ni bawk. Bio-medical Waste sawngbawl man hi State Advisory Committee-in a ruahman angin Hospital khum pakhatah Rs. 15 zel a ni ang a, Clinic-ah chuan bawlhlawh rih zawng a chawi tur niin Kg 50 hnuai lam ah Rs. 2500, Kg 50 – 100 ah Rs. 5000 leh Kg 100 chung lam ah Rs. 10,000 ang a bituk a ni.