48/2025-2026

Lawngtlai, 4th April, 2025 : International Fund for Agricultural Development (IFAD) ṭanpuinaa Mizoram puma ei leh bara hmasawnna tur leh kut hnathawh chawi kanna tura hma lakna, Mizoram FOCUS (Fostering Climate Resilient Upland Farming Systems in the North East) 2.0,  Lawngtlai District - a kalpui dan  tur chungchang sawihona DC Conference Hall-ah neih a ni a. Pu Cheemala Siva Gopal Reddy, IAS, Lawngtlai Bawrhsap chuan thutkhawm hi kaihuaiin, IFAD Design Mission Team-  te leh line department hrang hrang ai awhte an tel thei  a ni.

Pu Cheemala Siva Gopal Reddy chuan IFAD Design Mission Team leh Line Department kalkhawmte hnena lawmthu sawina  neiin, Lawngtlai district dinhmun tlangpui tarlanna  hun a nei a. Ei leh bara intodelh tura Lawngtlai district- in  hmasawnna tur a neih ang angte tarlangin, Focus 2.0 hlawhtling taka kalpui tura theihtawp chhuah a nih tur thu a sawi a. Tun dinhmunah 'Bana Kaih' chu kalpui mek a nih thu sawiin, kut hnathawktute chawikanna tur leh hlawkna tak tak an neih theih nan a Focus 2.0 tha taka kalpui a nih a besei thu a tarlang bawk. 

Pi Alessandra Gage, Mission Lead, NRM Officer, FAO, chuan  Focus 2.0 project  tlangpui sawifiahna a nei a. He project- ah hian market leh thil tharchhuah lamah nasa taka insawrbing a nih thu tarlangin, Kut hnathawktute nen a inbiakpawhna lam pawh ngaihpawimawh a nih tur thu a sawi. Pu Piyush Kanal, Co Team Lead, FAO,  chuan district pali ah Focus 1.0 hlawhtling taka kalpui a nih tawh thu sawiin, farmer- te tana tangkai leh pawimawh Focus 1.0 a kalpui  loh te chu  Focus 2.0 ah chuan kalpui  a nih thu a sawi a.Mipuite mamawh tak hriat a,  chumi hnua field - a  an mamawhte thar tura hmalak a nih dawn thu a tarlang a. Pu Rajshekhar Sambasivarao, Agri & NRM Specialist, chuan Focus 2.0 hnuaia compact/ cluster development kalpui pawimawhna leh Lawngtlai district- a kalpui tura ruahmanna siam dan tur tlangpui sawina a nei bawk. 

Thutkhawmah hian Lawngtlai District- a FOCUS 2.0 kalpui tura  line department - te nena thawhho dan tur te,  ei leh bara intoldelhna awm thei tura kut hnathawktute tanpui dan tur leh  huapzo taka project kalpui tura ruahmanna siam ngai hrang hrangte sawiho a ni a . Thlai chin  bakah Ran vulh lama hmalakna tur,  Compact/Cluster Development kalpui dan tur, thlai thar hralh kawnga hmalak dan tur bakah  Focus 2.0  hlawhtling taka kalpui tura tihmakmawh kawng hrang hrang sawiho a ni bawk. 

IFAD ṭanpuinain  Mizorama district pali (Mamit, Kolasib, Champhai leh Serchhip)-ah  FOCUS 1.0 project hi kalpui a lo ni tawh a. Tuna project thar, FOCUS 2.0 hnuaia hma lakna hi kum 6 chhung (2025-2026 aṭanga 2031-2032) atan Mizorama district zawng zawngah kalpui a ni dawn a. Mizoram sawrkar Agriculture & Farmers Welfare Department hnuaia Society for Climate Resilient Agriculture in Mizoram (SCRAM) chu Lead Implementing Agency tur a ni a. Lawngtlai District - a FOCUS 2.0 Project kalpui tur hian IFAD Design Mission Team- te hian khaw hrang hrang  tlawh kualin,  kut hnathawktute, Farmers Society  leh khawtlang hruaitute kawmin, hma lak dan tur an sawiho leh ang.