4019/2023-2024

Khawzawl, 29th February 2024: Kutthemthiamte leh mahni kutkawiha thilsiam te tan inphochhuahna hun chu Khawzawl DC Auditorium-ah March ni 7, 2024 khian buatsaih a ni dawn a. He mi puala inrawnkhawmna chu vawiin chawhnu khan Khawzawl Addl DC Pu Lalfakzuala hovin a pisaah neih a ni a. He huna tel duh te tan a hriattur pawimawh chu a hnuaia mi ang hian hriattirna chhuah a ni.

Sawrkar laipui Ministry of Tribal Affairs hnuaia Tribal Cooperative Marketing Development Federation of India Ltd. (TRIFED) chuan 07.03.2024 (Ningani) khian Khawzawl DC Auditorium-ah Khawzawl District chhunga kutthemthiamte leh mahni kutkawih thilsiam (Thir chher, puantah, tlereuh siam, hnam kaihhnawih lemziak, mau leh hnang hmanga thil siam, thlai leh a kaihhnawih atanga thil siam/thar chhuak) te tan inphochhuahna hun ‘Tribal Artisan Empanelment Mela’ a buatsaih dawn a. He hunah hian mahni thlai thar/ thil siam te sample pho chhuah tur a ni a. TRIFED atanga endiktu lo kal te duhzawng a nih chuan hlawm lian zawka lei sak an ni dawn a ni. He huna tel duh te chuan a hnuaia document tarlan te hi rawn ken tel tur a ni.

1. Mahni thil siam/ thil thar sample
2. Scheduled Tribe Certificate Copy
3. Aadhar Card Copy
4. Bank Passbook phek hmasa ber Copy
5. Passport Size Photo pahnih

Tribal Artisan Empanelment Mela-a tel duh te chuan phone number tarlanah hian ni 04.03.2024 tlai dar 05:00 hma ngeia inhriattir tur a ni. He huna tel te hi endikna a zawh fel hunah Bank Account kaltlangin TA-DA ? 600 pek an ni ang.

1. BDO represent - 8730831492
2. DUDO represent - 9862502585