4656/2024-2025

Khawzawl, dated 15th March 2025: World Consumer Rights Day 2025 chu chawhma dar 10 khan Auditorium, DC Office-ah hman a ni a, Pu Lalfakzuala, Addl. DC, Khawzawl District chu Chief Guest niin Pu Lalthawmmawia, President, MCU, Khawzawl chuan programme a kaihruai.

Khawzawl District MCU Secretary Pu K. Lalhmangaihzauva'n MCU hmalakna tlangpui report a pe a. Chawngtlai leh Tualteah te Consumer Club ṭha tak din a nih tawh thu leh Biate, Sialhawk, Khawhai leh Khawzawl Hermon vengah te mipuite dikna chanvo humhalh chungchang awareness neia chhuahvah leh thuai an tum thu ngaihthlak a ni bawk. Chief Guest hnen aṭangin mipui/consumer te'n kan right hria a, thil dik lote tihdik a nih zel theih nan hma la ngam turin a chah a. Pu R. Lalrinhlua, Inspector, FCS&CA, Khawzawl hnen atangin World Consumer Rights Day 2025 theme - 'A just transition to sustainable lifestyle' tih hmangin thusawi ngaihthlak a ni bawk. Khawzawl District-a Buhfai dahna Kudamah  a bukna hmanrua Digital Weight hman vek a nih tawh thu ngaihthlak a ni bawk.

He World Consumer Right Day 2025 programme-ah hian Official leh kalkhawmten consumer right leh a kaihhnawih zawhna leh sawihona neih zui niin dawra bungraw lei leh ration buhfai laknaah te buk dik taka lei/ la zel turin kalkhawmte infuih a ni bawk. Hei bakah hian Pu Liantluanga Chohte, EE, PHED, Khawzawl WATSAN Division hnen aṭangin Khawzawl town-a tui connection chungchang leh bill pek kaihhnawih chungchang ngaihthlak a ni bawk a ni.

Pu Lalramhluna, Inspector, FCS&CA, Khawzawl in kalkhawmte hnenah lawmthu sawiin hun tihtawp a ni.