4657/2024-2025

Lunglei, 2025 Vau thla ni 15: Vawiin khan Lunglei DC Conference Hall-ah consumer-te dikna leh chanvo inzirtir tharna ni, World Consumer Rights Day 2025 pualin hun hman a ni a. Lunglei District Bawrhsap Pi Navneet Mann chu khuallian a ni.

Pi Navneet Mann chuan kal khawmte chu World Consumer Rights Day chibai bukin, consumer-te dikna leh chanvo humhalh chu thil ṭul tak leh sawrkar pawhin a ngaih pawimawh a nih thu a sawi a. Sik leh sa danglam zel leh khawvel changkang zelin mihringte khawsakphung a thlak danglam rualin, mahni hriselna atan leh chhehvel khuarelin a tuar loh nana khawsak thiam a pawimawh thu sawiin, dawrah leh internet kal tlanga thil lei leh hman chungchangah mahni leh khuarel tana him tur ngaihtuah hmasak chu consumer-te mawhphurhna a nih thu a sawi a. Internet kal tlanga thil lei leh hralh a tam tawh avangin consumer-te chu a nihphung an hriat chian chauh leia hmang tur leh leilung leh boruak tichhe thei thil hmang lo tur te'n a chah a ni.

He hun hi Lunglei District Consumer Association (LDCA) General Secretary Pu R. Lalrochama'n a kaihruai a. LDCA President Pu JL Hmingthanga hnen aṭangin consumer-te chanvo hrang hrang leh consumer-te'n an chanvo an humhalhna kawnga Mizorama thil thleng ṭhenkhatte, LDCA chungchang leh an hma lak dan te ngaihthlak a ni a. Lunglei District Civil Supply Officer (DCSO) & Registrar, District Consumer Disputes Redressal Commission (DCDRC) Pu Lalremruata Sailo chuan ration buhfai leh eirawng bawlna gas kaihhnawiha consumer-te hriat tur pawimawh hrang hrang sawiin, Lunglei Government College (LGC)-a Associate Professor Pu C. Lalremchhunga chuan kumin World Consumer Rights Day thupui, "A Just Transition to Sustainable Lifestyles" tih hmangin khawvel leh a chhunga chengte tana nunphung tlo leh daih rei nei tura khawsak dan tur leh zawm tur pawimawh tak tak a zirtir bawk a. Mipui khawsak nghawng service pawimawh tak tak - PHED leh P&E officer-te, LPG distributor-te, internet service provider hrang hrangte leh petrol pump neitute nen consumer-te dikna leh chanvo chungchang leh consumer-te hriat tur pawimawh sawi hona leh zawhna leh chhanna hun hman a ni bawk a. Lunglei DCDRC Member Pu C. Zairemthanga chuan ṭawngṭaiin hun a khar a ni.

He hunah hian Lungleia sawrkar official-te, service provider hrang hrangte, LDCA hruaitute leh branch ai awhte, khawtlang hruaitute leh pawl hrang hrang ai awhte an tel a. Hun hman zawh chawhnu lamah LDCA branch ai awh kal khawmte'n Lunglei District Consumer Association hruaitu (office bearer) thar an thlang zui nghal a ni.

Khawvel pum huapa consumer-te dikna humhalh tura hma latu inzawm khawm pawl, Consumers International bul tumin kum 1983 aṭang khan March ni 15 hi World Consumer Rights Day atan hman ṭan a ni a. Kum 1962 March ni 15-a khatih laia US President John F. Kennedy-a'n US Congress-a "consumer-te dikna chanvo humhalh chungchang" a sawi aṭanga consumer-te chanvo humhalh tura hma lakna lo lian chho zel a nih avangin, March ni 15 hi World Consumer Rights Day atana rawt leh hman a ni.