New Delhia cham mek Chief Minister Pu Lal Thanhawla chuan vawiin khan ni hnih awh tur Jamia Millia Islamia University a Centre for North East Studies and Policy Research (CNESPR) Conference Rooma khuarel chhiatrupna chungchanga conference buatsaihah thuchah pawimawh tak a sawi. Conference hi CNESPR leh National Institute for Disaster Management, New Delhi tangkawp ina an buatsaih a ni.

Chief Minister chuan seminar buatsaihtute chungah tel ve tura an sawm chu lawmthu a sawi a. Sawiho tur chungchang hi hmarchhak bial tan a pawimawh bik hle a ni a ti a. Hmarchhak bial hi khuarel chhiatna tam tak lirnghing, tuilian, leimin leh thlipui lakah a himlo hle tih sawiin, lirnghing na ber thlen theihna a ni a ti a. Kumin 2016 January ni 4 a Manipura lirnghing aia nasa zawk helai bialah a thleng thei a ni tih min hriattirtu a ni a ti a. National Institute of Disaster Management a mithiamte pawhin Himalaya tlang chhuahlam ah lirnghing na taka thleng thei reng a ni tih an sawi chu a tarlang a. Kum 1950 a Assama lirnghing thleng aia hlauhawm zawk a thleng ang tih hi mi te hlauh anih thu sawiin, hmasawnna avangin chenna in tha tak tak a pung chho nasa a, mahse heng in te hi lirnghing lakah a himlo hle a ni a ti a. Chuvangin chhiatna namenlo hmachhawn thei reng kan nih avang hian lirnghing thlen thulhah chhiatna a thlen tlem theihnan mumal taka kalphung duante, lo inralrin dan leh a tak alo thlen palha tih tur leh tih loh tur lo zir lawk a pawimawh hle a ni a ti. Disaster Management Act, 2005 a inkaihhhruaina hi zawm a, sorkar, tlawmngai pawl leh mimal angten kan thawhho a tul a ni a ti.

In sak dan chungchangah hmarchhak state te hian tunlai leh pipute sak dan lakkawp a, a sak dan thuhmun hman pawimawh a tih thu Pu Hawla chuan a sawi a. RCC a in kan sa anih pawhin lirnghing laka him thei ber tura sak a pawimawh hle a ni a ti a. ‘Assam type’ kan tih ang te hi technology thar ber zel hmang chunga sak chu tha ber tura a hriat thu a sawi a. Khuarel chhiatna laka him a pawimawh avangin inzirtirna uar taka puanzar leh ‘social media’ te hman tangkai a pawimawh thei hle ang a ti. Khuarel chhiatna alo thlena a nghawng kal chho zel, mihring hriselna tichhe thei laka kan him theihna tura damdawi lam mithiamte koh zung zung an nih theina tura hmalakte, abikin thingtlang lamah a pawimawh hle a ni a ti.

Conference hian khuarel chhiatna thlen thulha mihring hriselna, rilru hahna leh buaina bakah in sak dan chungchangte ngaihpawimawh bikah a dah a. Nepal leh Manipurah lirnghingin chhiatna namenlo a thlen avanga hmarchhak bial pum leh Himalaya chhehvelte a him lohzia a tihlan avangin mipui vantlang ngaihpawimawh te leh kalphung mumal tak buatsaih dante sawiho a ni a. In sak danah pawh Mishing Style leh Assam Type te chu tunlai thiamna nen hmankawp a remchan dante sawiho a ni.

Conference agenda-te chu When the Mountains Move and the Water Rise , Coping with Earthquakes and Flooding tih leh The Health and Housing Dimensions tih te a ni a. Conference hawnna ah hian Prof. Sanjoy Hazarika, Director, CNESPR in inhmelhriattirna hun hmangin, Chief Minister Pu Lal Thanhawla bakah Pu Kiren Rijiju, Union Minister of State for Home Affairs, Prof. Talat Ahmad, Vice Chancellor, JMI University leh Prof. Santosh Kumar, Executive Director, NIDM, Prof Shiv Vishwanathan, Dr. Shekhar Pathak, P.D.Rai, Sikkim MP ten thuchah an sawi bawk a. Anni bakah hian University hrang hrang leh UNDP, IIT, Geo Hazard Society India te atangin mithiam chungchuang rual thahnem takin thupui thlan bik hrang hrangah thusawinate neiin, sawihona a awm nghal zel bawk a. State hrang hranga disaster management officialte, hmarchhak atanga mithim bik, zirbingna nei mekte an tel bawk. A ni-hnihnaa thusawi tur thahnemtak zingah CYMA a CEC member Dr. Malsawmliana’n ‘Disaster Responses in Mizoram With Particular Focus on the Role of YMA’ tih thupui hmanga thu sawi tura beisei a ni bawk a ni.

Chief Minister hi T.P.Khaund, Principal Adviser to the Govt of Mizoram leh Dominic Lalhmangaiha, Consultant, Mizoram State Disaster Management Authority ten an tawiawm a ni.