Vawiin khan Kolasib District Consumers' Union (KODCU) chuan Brig. C. Vankunga Shopping Complex, Diakkawn-ah Annual General Meeting an nei a, he hun hi Kolasib Bawrhsap Pu H. Lalengmawia, IAS in a hmanpui a ni.

Pu H. Lalengmawia chuan Kolasib District Consumers' Union chu pawl nung leh chhuanawm tak, consumer-te hmakhua ngaihtuaha, consumer-te chanvo leh dikna humhalh leh humhim anih theih nana pawl tangkai leh thawhhlawk tak nia a hmuh leh hriat thu a sawi a. Sumdawng leh Sawrkar Department te pawh hi kan zavaiin consumer kan ni vek a ni tih kan hriat a ngai a, chu hriatna nen chuan kan thawhhona a tha anga, tichuan mipui leh vantlang tan nasa zawkin hna kan thawk ho thei dawn a ni, a ti a. Consumer Union member te hian huaisen takin thil dik lo, kan hmuh leh kan hriat te do a, dik lo lai te siamthat anih theih nan midangte pen chhuak turin kan inzirtir a ngai a, heng thil te hi a thlenna turah kan thlen loh chuan consumer te hmakhua ngaihna lamah rah tha kan chhuah lovang tih a hlauhawm a ni, a ti bawk.

Kolasib District Consumer' Union te hi District Consumers' Union zinga hma la tha tak leh rim taka thawk thin nia hriat an ni a. District huam chhungah hian khaw hrang hrang leh zirna in thenkhat ah te Branch 40 vel an hawng tawh a ni.

Vawiin meeting ah hian mipui ina kan hnekhnai bik leh nitin khawsak nunphung atana pawimawh Department thenkhat te sawm a ni a. Member atanga zawhna leh thil hriatchian duh awmte chu Department aiawhte hian ko kim takin an chhang a ni.

Vawiin Annual General Meeting hi KODCU President Pu C. Lalbiakthanga chuan kaihruaiin Dr. C. Lalmuankima hnen atangin kum kalta a an hmalakna leh an hnathawhna General Secretary's Report ngaihthlak a ni a. Meeting ah hian khaw hrang hrang atangin Member an kal kim tha hle a ni.