Vawiin khan ni hnih awh ‘Sensitization of Middle School Teachers on Child Rights Protection’ chu Child Rights Protection Cell, SCERT bultumin Govt. Middle School zirtirtute tan SCERT Auditorium-ah neih a ni a. Asst. Project Coordinator Pu Lalthanfela’n progamme kaihruaiin Pi Vanlalruati’n programme thlirlawkna a nei.
SCERT Director Pi Laldawngliani Chawngthu chuan zirna kalphung thar chu Rights base, The Rights of Children to Free and Compulsory Education (2009) hnuaia naupangten an chanvo dik tak an chan theih nana hmalakna a nih thu a sawi a. Child Rights chuan naupangte hrekbehna, hleilenna, nunrawnna hrang hrang laka chhanchhuah leh venhimna pek a tum laiin naupangte pawh an dikna chanvo (Child Rights) chuan mawhphurhna (Responsibilities) leh tih tur (duties) a keng tel tih zirtir a tul thu a sawi. Director chuan nikum World Day for Prevention of Child Abuse thupui ‘Stop Bullying’ a nih thu sawiin naupang lian zawk leh chak zawk ten an aia chak lo zawkte an tihduhdah lohna turin zirtirtu an nihna anga hetiang hi a thlen loh nan hma la turin a fuih bawk.
Programme-ah hian zirtirtute tana tangkai subject thenkhat – The Rights of Children to Free and Compulsory Education (RTE), Child Rights and its Educational Implications, Behaviour Modifications, Childline, Gender Issues leh Personal Safety Rules for Children te zirho a ni a. He programme vek hi May ni 23 & 24, 2016 khan Primary school zirtirtute hnenah pek a ni tawh bawk.
