Mizoram Sawrkar hnuaia Principal Secretary, PWD hnen atanga thu dawn angin Tunhnaia ruah nasa tak sur avang khan Mizoram hmun hrang hrangah lei a min a, chu chuan kawng block a siam a. PWD enkawl kawng te hi Motor kal theih turin a thenfai hna thawh nghal char char a ni a. Tuna kawng block dinhmun chu hetiang hi a ni e.

National Highway 54 :

1. Kawnpui leh Khamrang inkarah ah ni 22.5.2016 atangin a block a, Hitachi pathum hmangin a paihfai hna thawh mek a ni a. Ni 27.5.2016 ah chuan motor kal theih tura paihfai hman beisei a ni.

2. Rangvamual khaw chhunga leimin thin chu JCB pakhat leh Hitachi pakhat nen vil reng a ni a. Motor kal theih a paihfai hna thawh thin a ni.

3. Phunchawng leh Airport Junction inkarah ni 21.5.2016 khan a block a. Paihfai hna thawh nghal a ni a. Tunah chuan motor kal theih a siam tawh a ni.

4. Zemabawk khawchhung hmun hnihah ni 21.5.2016 atangin a block a, Helipad hnuai ami chu Motor kal theih a thenfai nghal a ni a. Berawtlang hnuai ami chu JCB pahnih leh Hitachi pahnih leh leivung paihna tripper 20 hmangin a thenfai hna thawh mek a ni a. 27.5.2016 ah chuan Motor kal theih a thenfai hman beisei a ni.

5. Lunglei bul Hrangchalkawn-ah ni 21.5.2016 khan a block-a, ni 22.5.2016 khan Motor kal theih a thenfai leh nghal a ni. 6. Lawngtlai khaw chhungah ni 20.5.2016 atangin a block a, ni 22.5.2016 khan motor kal theih a thenfai nghal a ni.

Aizawl - Lunglei road : Melnga ruam (Hualngohmun thlen hma) leh Kelsih hnuaiah ni 21.5.2016 khan a block a, ni 22.5.2016 khan Motor kal theiha thenfai nghal a ni.