Vawiin khan Kolasib DC Pu H. Lalengmawia, IAS hovin kumina Chapchar Kut hman dan tur relin Department hrang hrang aiawh leh tlawmngai pawl hrang hrang hruaitu ten DC Conference Hall ah meeting an nei a. DC chuan Chapchar Kut chu Kolasib ah ropui leh hlimawm taka hman anih theih nan meeting a kalkhawmte chu an ngaihtuahna rilru sengin rawtna tha leh thil tihawm nia an hriatte chu sawi turin a sawm a. Meeting-ah hian District Level Chapchar Kut 2016 Organzing Committee ruangam tur sawizau anih hnuah he Committee hi din fel nghal a ni a, Committee ah hian Chairman chu Director SIRD ruat niin Senior Vice Chairman ah President Sub-Headquarters YMA Kolasib leh Vice Chairman-ah Addl. DC chu ruat a ni. Anni bakah hian Department thenkhat hotulu leh YMA, MHIP, MUP, MCO, MZI leh MJA aiawhte chu Member atan ruat an ni bawk.

Kolasib a Chapchar Kut hman na tur hian Art & Culture Department in cheng nuai 1 an rawn thawh dawn a, hei hian Kut buatsaihna tura mamawh leh tul zawng zawngte a phuhruk theih dawn loh avangin sum dang dap dan tur meeting ah hian rel a ni. Meeting chuan a tul zawng zawng buaipuia hma la turin Organizing Committee kutah mawhphurhna a pe a ni.