Vawiin khan Kolasib DC Conference Hall ah 8^th National Voters’ Day hman a ni.

He huna khuallian District Election Officer Pu R Zarzosanga chuan Vote thlak chu India khua leh tui tana tih makmawh a ni a ti a Vote thlak thei chin te chu India Danpui in mi puitling ah a ngai a, Ram hruaitu te thlanna kawngah mahni chhia leh tha hriatna hmanga Vote thlak a pawimawh thu a sawi bawk a ni. Kolasib District Election branch a thawkte chu mi tlemte mah ni se an hna a an inpekna chu fakawm tiin Vote thlak thei Kum 18 tling tawh te zawnchhuah leh an hming ziahluhna kawnga Electoral Registration Officer (ERO), Assistant Electoral Registration Officer (AERO) leh Booth Level Officer (BLO) te thawhrimna chu hriat hmaih chi a nilo a ti bawk.

He hunah hian National Voters’ Day puala Chief Election Commissioner Om Prakash Rawat  a thuchah chu thlirhona leh ngaihthlak hona neih a ni a. Khuallian kaihhruaina hnuai ah kalkhawm te chuan Voters’ Pledge chhiarna hun hmangin Kolasib District Assembly Constituency 3 a BRO thawk thazual mi 3 te hnenah lawmman pawisa fai cheng 3000/- leh Certificate hlan a ni bawk a, he lawmman hi Kolasib ST Assembly Constituency atangin Pu MS Dawngliana, Tuirial ST Assembly Constituency atangin Pu S. Sumeona leh Serlui Assembly Constituency atangin Pu R.Vanlaltlana ten an dawng a ni. Hemi bakah hian State Level Election Quiz intihsiakna a lawmman pahnihna dawngtu C.Lalawmpuia, JNV Thingdawl H/S leh Lalduhawma, C.Zakhuma HSS te hnenah Election Commission of India bultumin lawman pawisa fai cheng 15,000/- (7500/- ve ve) hlan an ni a, hemi bakah hian India Hnampa Mahatma Gandhi a ziak ‘My Experiments with Truth’ lehkhabu leh wall clock an dawng bawk a ni.

He hun hi Kolasib Election Officer Pi Marilyn Rualzakhumthangi’n a kaihruai a Electoral list a inziaklut thar mi 1914 atanga thlanchhuah mi 12 te hnenah EPIC semna hun hman a ni a, Electoral list thar ber atanga a lan dan in Kolasib District a voter awm zawng zawng chu mi 56,581 an ni.