Mizoram police chuan bank account hralh chungchang a mipuite hriattur pawimawhte a hnuaia mi ang hian a chhuah.

Hun engemaw atang khan Facebook, email, phone leh internet etc kaltlanga inbumna hi a hluar chho hle a. Hetianga inbumna laka mipuite kan him theih nan leh kan lo fimkhur theih zawk nan Police ten thuchhuah an lo siam fo tawh thin. Amaherawh chu vawiin thlengin harsatna sawi tham tak ala ni reng a, Mizote zingah ngei pawh a tuartu engemaw zat an awm tawh a ni. Heng misual, mi bum hmangte hian finrawl chhuahin thiam takin mi mawlmang zawk leh chinchang hrelo zawk te thiam taka bumin sum pek tlak hmasak tur pawisa (advance) an inthawn tir thin a. Thenkhatte phei chu tum khat mai nilo tum 2-3 te an pawisa an bum chhuahsak a, misualte hi biakzui tur awm lovin, pawisawilo bum tawkte hian an thawh chhuah sum leh pai tam tham takte an chan phah thin a, a pawi em em a ni.

Heng misualte hian an mi bumte pawisa lo dawnna atan anmahni bank account an hmang ngai lova, tunge an nih tih hriat theih miah lohna turin midang daih bank account an hman sak thin a ni. Misualte hian hetianga thil sual an tih nana an hman tur mi bank account lei chhawn tur hi an zawng reng a. Chuvangin mipuite kan fimkhur hle angai a, kan bank account te tuma hnena hralh emaw hman tir loh tur a ni. Misualte hman theih tura bank account kan hralh hian thilsual kan tih bakah misual vulh lenna a ni a, a hralhtu ngei pawhin mawhphurhna rip tak a neih theih phah thin a ni.

1)      Bank account/ATM hi hralh phal a ni lo. Midang/chhungkua i hmantir a nih pawhin thil sual tihnan an hmanglo a ni tih i hre chiang tur a ni.

2)      I bank account-a inbumna kaihhnawih thil transaction a lo awm anih chuan i mawhphurhna a ni a, dan anga hmalak tul thilah i hming leh address veka record a awm avangin i chungah mawhphurhna a lian hle dawn a, Police investigation pawh nangmah atanga tan tur a ni dawn a ni.

3)        Inbumna kaihhnawihah i bank account a lo lang a nih chuan, chu inbumna ah chuan telve a ngaih i ni a, mawhphurtu i ni ve a, Jail hial pawh i tan phah thei bawk a ni.

4)      Sum tlemte it a bank account i hralh chuan a hnu lawkah chu aia tam zawk sum police case kaihhnawihah i seng phah thei. Inchingfel leh turin i hun hlu tak i paih teuh anga, i hmingchhiat phah thei bawk.

5)      Sum tlemte it a mi bank account i leikhawma i lo hralhsak anih chuan i hlep aia tam i la seng leh thei tih hria la, mi pangai i nihna leh vantlang laka i rinawmna i ti hming chhia a, hremna na tak i hmachhawn thei bawk.

6)      Bank account hawn nan document lem (fake) i siam/hmang anih chuan dan anga hrem theih i ni. Nakina i inchhir loh nan passport photo hmangin document lem siam tirin hmang lovang che.

7)      Hriat chian loh phone call i.e. Hindi, English i dawnin chi-ai lo la, a hrechiangte rawn hmasa thin ang che.

Hetiang sualna chungchanga finfiahna/information hriat kan neih chuan SP CID (crime) Mizoram contact no. 0389-2334082 ah hriattir thin ang che.