2689/2025-2026

Kolasib, the 16th December, 2025: Vawiin khan DC Conference Hall, Kolasib-ah Bank account hrang hranga pawisa lakchhuah loh (unclaimed deposits) chhui chhuah leh chinfelna tura beihpui thlakna, 'Depositor Education and Awareness Fund (DEAF) 7th Phase' pualin hun hman a ni a. He hun hi Kolasib District Bawrhsap Pu Robert C. Lalhmangaiha chuan a hmanpui.

He hun hi Pu Thuamzamung Tunglut, Lead District Manager, Kolasib chuan a kaihruai a. Khuallian Pu Robert C. Lalhmangaiha, DC Kolasib chuan thu sawiin, Bank-te’n mipuite tana hamthatna leh an pawisa te him taka an hmuh let leh theih nana hetiang ruahmanna an kalpui chu lawmawm a tih thu a sawi a, hei hian mipuite an hmangaih zia a tilang a ni, a ti. Bawrhsap chuan he Campaign chungchang hi mipuite'n an hriat darh a, a neitu ten an chhawr tangkai ngei theih nan District Information and Public Relations Officer (DIPRO) te nen tangkawpa hma la ho turin kalkhawmte chu a chah bawk a ni.

Vawiina hun hmanah hian DEAF account chungchang leh hmalakna hrang hrangte ngaihthlak a ni a. He ruahmanna hian a tum ber chu, account rei tak khawih chet lohva awm (inoperative account), a bik takin kum 10 aia rei khawih chet tawh lohna savings emaw current account-a pawisa awmte leh kum 10 chhunga lakchhuah tawh loh term deposit-te a neitu dik takte emaw, an roluah tute hnena pek let leh hi a ni.

Dan dinglai angin, bank-te chuan hetianga pawisa awmte hi Reserve Bank of India (RBI) enkawl, Depositor Education and Awareness Fund (DEAF)-ah an dah lut thin a. Mipuite'n awlsam taka heng pawisa te hi an zawn hmuh theih nan, RBI chuan online platform him tak, UDGAM (Unclaimed Deposits - Gateway to Access Information) portal a siam a, hetah hian mi tinin bank hrang hranga an pawisa lakchhuah loh te hmun khatah an chhui thei a ni.

Kolasib District-ah hian October ni 1, 2025 atang khan 'Camping for Settlement of Unclaimed Deposit in Account' hi kalpui tan a ni a, tunah hian a thawh sarihna (7th phase) kal pui mek a ni.

Vawiin hunah hian Kolasib DC leh LDM bakah RBI Manager leh Assistant Manager te leh Kolasib District chhunga Bank Manager te an tel a ni.