2523/2023-2024

2023 Khuangchawi thla ni 27: Kolasib Diakkawn Square-a ICICI (Industrial Credit and Investment Corporation of India) Bank, Kolasib Branch din thar chu vawiin chawhnu khan Kolasib District Bawrhsap Pu John LT Sanga chuan a hawng.

Kolasib Bawrhsap Pu John LT Sanga chuan ribbon chep chatin ICICI Bank Kolasib Branch hi a hawng a. Bank Branch thar hawn lawmna cake a zai nghal bawk.

Kolasib Bawrhsap Pu John LT Sanga chuan Mizoram, a bik takin Kolasib District-ah bank hrang hrang an lo lut chu lawmawm a tih thu sawiin, bank a awm belh zel chuan an inkarah inelna ṭha a siam dawn tih a sawi a. Private bank rawn lut tharte chu District hmasawn zelna tur a ni tih hriain, a theih ang anga dawm kan an ṭul tih a sawi. Bank rawn lut tharte tih phur nan sawrkar pawisa, bank-a deposit ṭhinte leh sawrkar scheme hrang hrang kalpui ṭhinah an performance rualkhai zawka kalpui a nih theih nan bank pakhat chauh hmang lo va, sem rual a ṭhat thu sawiin, Bawrhsap chuan heti ang thil hrang hrang hi bank pakhat chauhin a pumbilh chuan bank dang tan ṭhan chhoh ngaihna a awm lo ang tiin, bank lian leh hmasa zawkah te deposit a tam deuh a nih pawhin bank awm tharte ngaihsak chunga hma lak a ṭul tih a sawi.

ICICI Bank, Kolasib Branch hian Diakkawn Square-ah mimal (Pu Lalnithanga) in an luah a. Bank Branch thar hawnnaah hian ICICI Bank Regional Head Pu Deepak Singh leh hotu dangte chu Silchar aṭangin an lo kal a. Sawm bik mi eng emaw zatin an telpui bawk.

ICICI Bank hi Mizoramah kum 20 vel an awm tawh a. Tunah hian Mizoramah branch 5 an neih tawh bakah, Aizawlah branch thar hawn belh an tum leh mek thu an hotute chuan an sawi a ni.