3798/2023-2024

2024 Ramtuk thla ni 13: Vawiin khan Kolasib-a Chapchar Kut 2024 hman dan tur relin Organising Committee chu an Chairman, District Bawrhsap Pu John LT Sanga hovin Kolasib DC Conference Hall-ah an ṭhu khawm.

Chairman Pu John LT Sanga chuan hnam ziarang leh nunphung, zai, lam leh hnam thuam chi hrang hrang tar lanna hun bik, Chapchar Kut kan nei hi a hlu hle a ni tiin, Mizo hnam ziarang chawi nun nan leh ṭhangtharte'n pi pute nun ze mawi an chhawm zel theih nan uar leh hlut deuh deuh a pawimawh a ni, a ti a. Chapchar Kutin hlut a hlawh deuh deuh theih nan a huaihawttute'n rilru inhawng leh tihtak zeta huaihawt a pawimawh thu a sawi.

Chapchar Kut Organising Committee-ah hian sawrkar department hrang hrang official-te, Sub-Headquarters YMA, Sub-Headquarters MHIP, District Headquarters MUP, Sub-Headquarters MCO, MZI Headquarters Kolasib leh District MJA ai awhte an tel a. Chapchar Kut 2024 hmanna tura thil ṭul hrang hrangte sawi ho niin, hlung taka hman a nih theih nan ruahmanna siam a ni a. Organising Committee ai awha Chapchar Kut hmanna tur thil ṭul hrang hrang lo bawhzui turin Sub-Headquarters YMA Vice President Pu C. Liankunga Chairman-na hnuaiah Working Committee din a ni a. Sub-committee hrang hrang - fund collection; stage construction & decoration; light & sound; refreshment; ushering; water & sanitation; chhawnghnawh; medical; security & traffic management leh photo booth sub-committee-te din a ni bawk.

Kumin Chapchar Kut hi March ni 1, 2024 (Zirtawpni) hian Kolasib Ṭumpui Field-ah hmang tura ruahman a ni a. Kolasib Bawrhsap chu Kut Thlengtu tur niin, Kut Pa atan Mizoram Legislative Assembly Deputy Speaker Pu Lalfamkima, Kolasib bialtu MLA beisei a ni a. Hemi ni hian hnam lam chi hrang hrang thlir tur leh zaithiamte zai ngaihthlak tur a awm ang a; infiamna chi hrang hrang, hnam incheina danglam chhoh dan entirna costume parade leh chhawnghnawh te pawh tih tel tum a ni a. Organising Committee chuan hnam ziarang tar lang thei zawnga inthuam a, Chapchar Kut lawmna hun hi chhim ṭheuh turin District mipuite a sawm a ni.