3799/2023-2024

2024 Ramtuk thla ni 13: Mizoram State Day 2024 puala ram pum huapa ṭawngṭai rual ni, 'State Day of Prayer' hman tur chungchangah vawiin khan Kolasib District Bawrhsap Pu John LT Sanga hovin Kolasib DC Conference Hall-ah ṭhut khawm buatsaih a ni a, Kolasib-a State Day of Prayer hman dan tur rel a ni.

He hunah hian Kolasib Kohhran Hruaitute Committee, Sub-Headquarters YMA, Sub-Headquarters MHIP, District Headquarters MUP, District MJA leh Kolasib Joint VC hruaitute an tel a. State Day of Prayer (SDP) Committee Vice Chairman Upa Dr R. Vanlalzauva hnen aṭangin SDP hman tum chhan leh Aizawla SDP hman dan tur ruahmanna te ngaihthlak a ni a. Kolasib-a SDP hman dan tur rel zui nghal a ni.

Ram tana ṭawngṭai rual hun hi Mizoram State Day, February ni 20, 2024 (Thawhlehni) chawhma dar 10:00-ah Kolasib Ṭumpui Field-ah buatsaih a ni dawn a. Hun hman dan tur kimchang chu Kolasib KHC lamin an ruahman dawn a. He hun hi ngai pawimawh a, ram tana ṭawngṭai tura pen chhuak turin Committee chuan Kolasib District mipui zawng zawng a sawm a ni.