3800/2023-2024

Aizawl, the 13th February, 2024: Vawiin chawhnu dar 2:00 khan Environment, Forests & Climate Change Department, Land Resources, Soil & Water Conservation Department, Horticulture Department, Cooperation Department, Agriculture Department, Apex Bank hotute leh PACS hruaitute telna Policy Coordination Committee chu Agriculture Minister Room, MINECO-ah an thukhawm.

Thukhawm chuan sawrkar policy tihhlawhtlinna hmanrua ni tur leh kuthnathawktute'n an thlai thar mumal leh awmze nei zawka an hralh theih nan khaw hrang hrangah society din tura hma lak zel nise a ti a. Hemi tur hian Cooperation Department chu mawhphurhna pek niin a tul angte bawhzui tura ruat a ni a. Apex Bank hnuaia Primary Agriculture Credit Society (PACS) te chu policy tihhlawhtlinna turin kutkeah hman nise tih a ni a; anniin a tul angin registration leh training-te lo neihpui se tih a ni bawk.

Heng bakah hian he hunah hian sawrkar policy-te hlawhtling taka kalpui a nih theih nana hmalak dan tur leh pawimawhte zau zawka inzirtir a tul thu te, mawhphurhna nei hrang hrangte lungrual taka convergence hmanga an thawhho dan turte leh pawimawh hrang hrangte sawiho a ni.

He hunah hian Environment, Forests & Climate Change leh Land Resources, Soil & Water Conservation Department changtu Minister Pu Lalthansanga, Agriculture leh Cooperation Department changtu Minister Pu P.C. Vanlalruata, Adviser to Chief Minister (Implementation of Hand-holding Policy) Dr. KC Lalmalsawmzauva, Line Department hotute leh ZPM Market Study Team-te an tel a ni.