3815/2023-2024

2024 Ramtuk thla ni 14: March ni 1, 2024 (Zirtawpni)-a Kolasib Ṭumpui Field-a Chapchar Kut 2024 hman tur chungchanga thil pawimawh hrang hrang sawi hovin vawiin khan Kolasib Chapchar Kut 2024 Working Committee chu Kolasib DC Conference Hall-ah an ṭhu khawm.

He ṭhut khawm hi Organising Committee Chairman, Kolasib District Bawrhsap Pu John LT Sanga chuan telpuiin, Chapchar Kut hlawhtling tak hman a nih theih nan chanvo leh mawhphurhna hrang hrang neitute chu theih tawp chhuah turin a chah a ni.

Ṭhut khawm hi Working Committee Chairman, Kolasib Sub-Headquarters YMA Vice President Pu C. Liankunga'n a kaihruai a. Vice Chairman, Kolasib Sub-Headquarters MUP President Pu C. Lianzuala'n ṭawngṭaina hun a hmang a. Chapchar Kut 2024 hmanna tura mawhphurhna hrang hrang sem sawm niin, hun hman dan tur tlangpui ruahman nghal a ni a. Chapchar Kut lawmna hi chawhma dar 10:30-ah ṭanin, tlai dar 4:00 thleng hun hman ni se, tih a ni a. He hunah hian nikuma Kolasib District aṭanga huaisen chawimawina dawngtute lawmpuina leh chawimawina hlan ni se, tih a ni bawk.

Ruahman lawk dan chuan Chapchar Kut lawmna huna chanvo nei turin - District Headquarters MUP aṭangin hlado leh upa titi; Sub-Headquarters MHIP aṭangin costume parade, siktuithiang lam leh chhawnghnawh; Sub-Headquarters YMA aṭangin Mass Cheraw (Kantluang); Mizo Cultural Organisation (MCO) Kolasib aṭangin tlanglam, chheih lam leh chai; Mizo Zaimi Inzawmkhawm (MZI) Headquarters Kolasib aṭangin hawnna hla kaihhruai leh zaithiam hrang hrang zai tur ruahman; Kolasib District Tug of War Association aṭangin inhruipawh te beisei a ni a. ZOOM Kolasib te'n Kut hmannaa kalte aṭangin Chapchar Kut Nula leh hnam thuama inthuam hmeichhe naupang leh mipa naupang inchei nalh ber (best costume) te an thlang leh dawn a. Kum upate tan a hranpaa ṭhutna ruahman leh tum niin, ei leh in tur - thingpui sen, kurtai, bal leh pangbal te buatsaih ni se, tih a ni a. Mahni insengsova dawr hawng duhte tan hawn phalsak ni se, tih a ni bawk.

Kum 2024 Chapchar Kut pual hian Working Committee chuan February ni 28 (Nilaini) aṭanga March ni 1 (Zirtawpni) thlengin a tam thei ang ber Zo hnahthlak thuama inthuam turin District mipuite a ngen a; Chapchar Kut lawmna hun pawh chhim vek turin a sawm bawk a ni.