3814/2023-2024

14.02.2023 : Election Commission of India thuchhuak bawhzuiin Champhai District-ah Nimin February ni 13 atanga ni 16, 2024  thleng awh tur EVM leh VVPAT te endik hna (First Level Checking) kalpui mek ani. Electronics Corporation of India Ltd(ECIL) in Engineer pathum rawn tirin Election official-te leh political party hrang hrang ai awhte enpuina hnuaiah EVM leh VVPAT te hi LOK SABHA MP inthlannaa hman tlak a nih dawn leh dawn loh an endik dawn a ni.

District Election Officer Pu James Lalrinchhana chuan inthlan felfai leh thianghlim tak kan neih theih nan Political Party aiawh a FLC chhunga duty tur te chu Thahnemngai lehzual zawka thawhpuiah a sawm a, FLC neih chhung hian an chanvo te tha taka hlenchhuak turin a ngen bawk a ni. Tin, inthlan fefai tak kan neihna kawnga venhminna hna thawktu Police Department chungah pawh lawmthu a sawi a. District chhunga Sorkar hnathawk leh NGO te inpeknaah pawh lawmthu sawiin inthlanna felfai tak kan neih theih nana thawhhona tha neih a pawimawh thu a sawi bawk ani.

Deputy DEO Pu M. Misael, FLC Supervisor ni bawk chuan thusawiin MLA inthlan kan neih zawh takah Party mi te nen thawhhona tha tak an lo neih tawh chu chhunzawma tun tum MP inthlan kan hmachhawn turah pawh kan ram leh hnam tan a ni tih hrereng chunga kan chanvo te phur taka ti zel turin a chah bawk a ni.

Election Officer Pu Benjamin Zalawma Ralte pawhin Champhai District-a EVM leh VVPAT neih dan report tawi a pe a. Champhaiah hian tun dinhmunah Ballot Unit - 142, Control Unit - 140, VVPAT - 154 endik tur ani a. EVM leh VVPAT  endikna pal tlangte hi uluk taka chhinchhiah niin, security-te venhminna hnuaiah khawih danglam theih loh tura strong room-ah kalh hnan zel ani.

Tun dinhmunah Champhai District-ah hian Assembly Constituency pathum(3)awmin polling station 84 a awm a, voters mi 57,454 an ni a, mipa 28,018 niin hmeichhia 29,436 an ni thung.