3813/2023-2024

Dated Serchhip, the 14^th February, 2024: Vawiin khan Serchhip-a Chapchar Kut 2024 hman dan tur relin Organising Committee chu Adl. DC Pu James Lalnithanga hovin Serchhip DC Meeting Hall-ah an ṭhu khawm.

Pu James Lalnithanga chuan Chapchar Kut hlim leh lawm taka mipui ten kan hman theih nan a huaihawttute'n rilru inhawng leh tihtak zeta ngaihtuah a pawimawh thu a sawi a. State level-ah Chief Minister kaihhruaina hnuaiah hman dan tur rel niin District tinah pawh he hun hi hmang tura tih kan ni, a ti a. Mizo culture vawnhim nan te, thangthar ten Mizo nunphung an hriat theih nan te, kan hnam rohlu chawisan a, chhawm nun zel a nih theih nan te Chapchar Kut hi a pawimawh takzet a ni, a ti.

Chapchar Kut Organising Committee-ah hian sawrkar department hrang hrang hotute , Sub-Headquarters YMA, Sub-Headquarters MHIP, District Headquarters MUP leh District MJA aiawhte an tel a. Chapchar Kut 2024 hmanna tura thil ṭul hrang hrangte sawi ho niin, a programme chipchiar duangtu tur atan Sub Headquarters YMA te chu ruat an ni. Power supply, tui in tur, medical leh sanitation te chu a changtu sawrkar Department te kutah dah a ni a. Security chu District Police te kutah dahin a puibawm tu tur atan YMA te ruat ni se tiin an rel.

Kumin Chapchar Kut hi March ni 1, 2024 (Zirtawpni) chawhma dar 11 ah tanin, Serchhip Sports Complex-ah hman ni se tiin Committee chuan a rel a. Serchhip DC chu Kut Thlengtu tur niin, Kut Pa atan Agriculture Minister Pu PC Vanlalruata, Tuikum bialtu MLA chu sawm ni se tiin an rel.

Chapchar Kut ah hian mipui nawlpui tel theihna tur Mizo infiamna chi hrang hrang te, Mizo hnam lam chi hrang hrang thlir tur leh zaithiamte zai ngaihthlak tur a awm dawn a. Organising Committee chuan Chapchar Kutah mipui a tam thei ang ber tel turin a sawm a ni.