4047/2023-2024

2024 Vau thla ni 5: Vawiin khan Kolasib District Cooperative Development Committee (DCDC) chu an Chairman, District Bawrhsap Pu John LT Sanga hovin Kolasib DC Conference Hall-ah an ṭhu khawm a. Kolasib District chhunga cooperative society (C/S)-te hmasawnna tur kawng hrang an sawi ho.

Kolasib DCDC Convener, District Cooperative Officer Pu Lalthlamuana chuan report pein, ṭhut khawm buatsaih chhan a sawi fiah a. Kolasib District chhungah sector hrang hrang 15-ah cooperative society din leh inziak lut 97 an awm mek thu a tar lang.

Cooperative society-te zingah primary agriculture cooperative credit society (PACS) anga kal a, member-te hnena sum puktir thei tura bank ang deuhva kalpui tura ruahmanna awm mekah, Mizoram chhungah PACS 73 awm tawhin, Kolasib District-ah PACS 6 an awm mek a. PACS te hi bank tenau anga kalpui a nih dawn chuan khawl nung (online) hmanga eng kim kalpui a ṭul dawn avangin khawl hmanga thlun zawm (computerised) tur a ni a. A thawh khatna (phase 1)-ah PACS pahnih - Kolasib Multipurpose C/S Ltd leh Kolasib Village Farming C/S Ltd te chu khawl thlun zawm tawh niin, khawlthluaknei, a tihnunna, lehkha herna leh hmanraw mamawh dangte pek an ni a. A thawh hnihnaah PACS pali - Kawnpui LAMPS, Saipum Broom Growers, Kawnpui Village Farming leh Vairengte Consumer C/S Ltd-te chu khawl thlun zawm tura hma lak leh ni se, tih a ni.

He hunah hian Ministry of Cooperation-in PACS te tana inkaihhruaina, common bye-law nei tura a tih bawhzuia Mizoram Registrar of Cooperative Societies (RCS)-in inkaihhruaina Mizo ṭawnga lehlin a lo thawn chu Kolasib District chhunga PACS paruk leh inziak lut thar apiangte hmantir zel ni se, tih a ni a. Pradhan Mantri Bhartiya Janaushadhi Pariyojana (PMBJP) hnuaia damdawi zawrh phalna dil tura C/S panga thlan chungchang te, Pradhan Mantri Kisan Samridhi Kendra (PMKSK) hnuaia lei ṭha zawrh dil tura C/S pariat thlan chungchang te, ran vulh leh sangha khawi lama tui mite'n PACS an din belh zel theihna tura hma lakna chungchang te, National Cooperative Data Base-a C/S-te dinhmun tharlam thun luh zung zung a nih theih nana hma lakna chungchang leh Kolasib District chhunga C/S-te hmasawnna tur thil pawimawh hrang hrang sawi ho a ni bawk.