4046/2023-2024

2024 Vau thla ni 5: Vawiin khan National Immunisation Day hman niin, Kolasib District pumah naupang kum 5 hnuai lam hnena zenghri danna pek beihpui thlak (intensified pulse polio immunisation) kalpui a ni a. Zing dar 10-ah Kolasib Diakkawn (Bata dawr kawt)-ah Kolasib District Bawrhsap Pu John LT Sanga hovin a hawnna hun hman a ni.

Pu John LT Sanga chuan zenghri danna pek chu naupangte hriselna atana hma lakna hlu leh ropui tak a ni, a ti a. Mihringin hriselna kan hloh chuan thil zawng zawng kan hloh tihna a ni tiin, District mipuite chu hriselna ngai pawimawh turin a chah a. Chhungkua leh tu leh fate hriselna chu nute mawhphurhna chauhva dah lo va, pahote pawhin mahni leh chhungkaw hriselna vei a, ṭan la thar turin a chah a. India ram pumah pulse polio immunisation hman ṭhin a nih avang te, routine immunisation-ah zenghri danna (polio vaccine) naupangte pek ṭhat a nih avang te'n zenghri hi a awm tawh lovah ngaiin, World Health Organisation (WHO) chuan kum 2014 khan India ram chu zenghri awm tawh lohna ram, Polio Free Country-ah min puang a; mahse, khawvel ram dang pasarihah zenghri hmuh a la nih avangin zenghri laka invenna hi kan ngaihthah a thiang lo a ni, a ti a. Fate an hrisel chuan in chhung boruak a nuam ṭhin tiin, tu leh fate an damloh changa damdawi in pan vat ṭhin turin kal khawmte chu a chah a ni.

Zenghri dan beihpui thlak hawnna hun hi Kolasib District Senior Chief Medical Officer Dr RK Lalthlamuana chuan a kaihruai a. District Task Force on Immunisation member-te, hriselna lama thawktute, nu leh pa leh naupangte kal khawmin, naupang kum 5 hnuai lamte hnenah zenghri danna kaa thlawr chi (oral polio vaccine) pek nghal a ni a. District chhung hmun hrang hrangah zenghri danna pek hi kalpui chhunzawm nghal a ni.

Tun ṭum National Immunisation Day-a zenghri danna pek tur hi Kolasib District-ah target naupang 8,389 an awm a. Vawiin khan District chhung khaw hrang hranga booth 122, transit 2 leh high risk area (HRA) 9-ah hri danna pek hi kalpui a ni a. Vawiina pek bakte chu naktuk, March ni 6 aṭang khian in tinah lut chhuakin pek chhunzawm an ni ang.