Vawiin khan Kolasib I&PR Conference Hall ah inthlanna neih zawh taka December ni 11 a vote chhiar tu tur te tan training buatsaih a ni.

Training hi Pu Laltanpui Hnamte Addl DC leh Dy.DEO chuan a pe a, Vote chhiar ni a Representation of The People Act 1951 hnuaia Official ho mawhphurna te, thil tih tur leh tiloh tur te, Counting Centre a Security ruahmanna te, Postal ballot kaltlanga Vote chhiar tur chungchang te, vote chhiar kalphung te, Form hrang hrang hmanga Election Result report dan te bakah Result puanchhuah chungchang te chu chipchiar taka sawifiahna hun a hmang a, Counting Official te hnen atangin thil hriatfiah duh chungchangah te  zawhna leh chhanna hun hman a ni.

Kolasib DEO Dr.Arun T,IAS chuan vote chhiar ni a Duty tur te chu fimkhur tak leh uluk taka hna kalpui tura chahin rilru fim tak pu a mahni hna hlen chhuak theuh turin duhsakna a hlan bawk a ni. DEO chuan Counting Officials bakah Counting Hall a lut tur te tan Mobile Phone, Cigarrette leh Lighter te ken luh phalloh a nih thu tarlangin Counting Hall a vawikhat luh tawh chuan Counting Hall Building chu Vote chhiar zawh hma loh chhuahsan phal a niloh thu a tarlang bawk a ni.

Kolasib District a Vote chhiar ni a Duty tur hian Counting Micro Observer a tan mi 57, Counting Assistant a tan mi 50 bakah Counting Supervisor a tan mi 50 ruat lailawk an ni a, remchan dana zirin siksawi theih an ni ang. Kolasib District hnuaia A/C tin a vote tla te chu Govt. Kolasib College a Hall hran theuhah chhiar tur niin Tun dinhmuna ruahmanna kal ah chuan Tuirial A/C Counting Hall ah Counting table 6, Kolasib A/C Counting Hall ah Counting table 6, Serlui A/C Counting Hall ah Counting table 14 te chu ECI atanga phalsak a nih thu tarlan  ani a,  hetih lai hian Hall zauh dana zirin Counting Hall tin a Counting Table awm tur zat hi ruahmanna dang siam tur niin ECI ah phalna dil tum a ni.