Kolasib Joint NGO Coordination Committee-in Kawnpui - Bilkhawthlir inkar NH-54 kawng chhe lutuk siam that ngiata Road Block tukin zing dar 5 atanga an neih chu BRTF hotuten January 26, 2009 atanga Kolasib atanga tana siam hna thawh an tum thu ziaka an tiam avangin vawiin chawhnu dar 2:30 khan tih tawp a ni.

 

Kolasib D.C.Pu Dawngliana hovin a office chamber-ah BRTF hotute, NGO zawng zawng aiawhte leh sawrkar hotu pawimawhte vawiin chhun dar 12:30 khan hemi chungchang sawi hian an thukhawm a. BRTF lam atangin C.E. aiawhin Pu George Cherian, Commandant, 36 BRTF leh officer dang pahnih an tel a. Sawrkar lam atangin S.P. Pu Lallianmawia, Addl. D.C. Pi Zoramthangi Hauhnar leh midangte an tel bawk a. NGO aiawhte an kim bawk.

Sawihona zau tak neih a nih hnu in BRTF lam chuan tuna Bilkhawthlir a hna thawh mek chu tun atanga ni 10 chhung ngeia Kolasib-a insuan an remti a. Hna thawh hun tur atan tun thla January 27 nise tiin thawhhona tha tak neih an duh thu pawh an sawi a ni.

NGO lam atanga thu sawitu Pu C.Zomuanpuia, MZP President, NGO Joint Co-ordination kaihruaitu chuan MZP anga hma an lakna kawng hrang hrangah BRTF chu rinngam an har tawh hlea a hriat thu leh hna thawk tura an inbun pawha reilotea an tiltiak leh mai thin thu te, nasa taka kawng hrang hranga an nawr chung pawha rah tha a chhuah theilo chu lunghnur thlak an tih thu a sawi a.  Thusawitu dangte pawhin Kolasib leh a chhehvela kawngpui chhe lutuk chu thil zahthlak, hriselna atan pawha pawi tham a nih thu an sawi a.  BRTF aiawh  Pu Cherian-a chuan, an theihna ang tawka thawh an inhuam thu leh a hma-a thil kal tawh te, officer a hma a mite hun laia thil felhlel awmte theihnghilha mipui tawiawmna a thawh a duhthu a sawi a ni.

D.C.Pu Dawngliana chuan mitinin kan duh chu kawng tha a ni a. Chuvangin BRTF ten a thara thawh an tumna chu zahawm a tih thu sawiin, NGO aiawhte chu mipui hrek zawnga road block pawh titawp turin a ngen a, chu chu ngai pawimawhin he darkar 48 road block hi tih tawp nghal a nita a. January 27-a hna tanna tur hi BRTF leh NGO te chuan inremna thuthlung an ziak nghal a ni.