2632/2023-2024
2023 Sahmulphah thla ni 3: Mizoram Legislative Assembly Inthlanpui, 2023 lo awm tura Kolasib District chhunga inbuatsaihna hrang hrang dinhmun leh inthlang tura inpeih fel dante thlir hovin vawiin khan Kolasib District Election Officer Pu John LT Sanga leh Kolasib District chhunga Observer-te hovin DEO office chamber-ah ṭhut khawm buatsaih a ni.
He hunah hian Kolasib District General Observer Pu Anant Lal Gyani, Expenditure Observer Pu Karni Dan, Police Observer Pu S. Chaitanya, Returning Officer-te leh Assistant Returning Officer-te, Superintendent of Police leh CAPF commandant-te leh ramri hrula duty tur Sector Officer-te an tel a. Inthlan kaihhnawiha Kolasib District chhunga thil thleng hrang hrangte thlir hovin, inthlan buatsaih tura Election Commission of India-in tih tur a tih ang bawhzui leh peih fel a nih dan te, inthlan felfai, thianghlim leh muanawm tak a awm theih nana hma lak zuina tur hrang hrangte an sawi ho a ni.
Kolasib DEO Pu John LT Sanga chuan DEO aṭanga ruahmanna hrang hrang bawhzui a nih dan report a pe a. Tih tur hrang hrang ruahmante chu a hun takah peih fel leh hlen chhuah zel a la ni tih a sawi a. Observer-te chuan an chan ṭheuhva an thil hmuh dan sawiin, eng kim a kal tluang nia an hriat thu an sawi.
Kolasib Sr Superintendent of Police Pu Lalrinawma Traite chuan venhimna (security) lama ruahmanna hrang hrang report a pe a. Kolasib District chhungah Central Armed Police Force (CAPF) aṭangin security duty tur Nagaland Police company 2 leh SSB company 2 lo tirh an nih thu leh hmun hrang hrangah duty-a an insem darh thu a sawi a. Police Station hrang hrangte kaihhruainain an huam chhungah CAPF-te nen hian patrolling kalpui reng a nih thu a sawi a. Ramria venhimna chungchangah border check post 1 awm sa bakah Nakas 4 siam belh a nih thu sawiin, inter-state leh inter-district ramri hmun 6 - Vairengte, Saiphai, Bairabi, Phaisen leh Saihapui 'V'-ahte lirthei lut leh chhuak vilna atan cctv a tawn tawna vuah a nih thu a sawi a. Kolasib District chu Zone 5-ah ṭhenin, MPS officer-te kaihhruainain November ni 6 leh ni 7-ah duty a ni dawn tih sawiin, District chhunga venhimna uluk ngai zual (critical) polling station 7-ah CAPF 10 zel duty-tirin venhimna uluk lehzuala kalpui a ni dawn tih a sawi bawk.
District Election Office aṭangin Kolasib District hi Sector 16-ah ṭhen niin, inthlan nia polling station hrang hrangte lo vil chhawng tur Sector Officer 16 ruat an ni a. Anni hian khawl leh thil danga harsatna awm thulhah rang takin an sector huam chhunga polling party-te an lo ṭanpuiin, an harsatna an lo chin felpui ṭhin dawn a. Hei bakah hian, critical polling station 7-a inthlan nia thil thlen dan uluk taka lo vil turin micro observer ruat an ni bawk.
Attachment
- Loading attachment...
