2055/2024-2025

Dated Kolasib the 13th September, 2024: Vawiin khan Samagra Shiksha, Kolasib District buatsaihin NIPUN Bharat Awareness Programme leh Distribution of Tablet chu BRC Hall-ah hman a ni a, he hun hi Deputy Speaker Pu Lalfamkima, Kolasib bialtu MLA chuan khuallian niin a hmanpui.

NIPUN Bharat Awareness Programme leh Tablet semna hun hi DPC Pu Vanlalchhana (DEO) chuan a kaihruai a, Kolasib District chhunga Primary School leh Middle School 128 te hnenah Zirlai ten an zirna kawnga an hman tangkai tur leh School in an activity report an pekna tur hmanrua atan Tablet sem chhuah anih bakah NIPUN Bharat hnuaia Mizoram pum huap Music Video siam intihsiaknaah Kolasib District-a Kawnpui Primary School 3 chuan pathumna lawmman a dawn hlanna hun hman a ni bawk. Heng lawmman leh thilpek te hi Kolasib Bialtu MLA, Deputy Speaker Pu Lalfamkima chuan a hlan a ni. 

He hunah hian khuallian Deputy Speaker Pu Lalfamkima chuan thusawiin Zirlaite leh zirtirtu te tana Tablet sem chhuah a ni chu lawmawm a tih thu leh Sawrkar laipui hmalakna tha tak chu a tihlawhtlingtu ni zel turin zirtirtu te chu a fuih a, zirtirna kan kalpui dan a danglam tawha, khawvel changkang chho zel mila zirna kan kalpui thiam a pawimawh a ni a ti a, tun dinhmunah chuan Internet hmangin zirna kawngah kan duh ang information kan hmuh theih tawh avangin hman tangkai thiam a pawimawh a ni, a ti bawk. 

Deputy Speaker chuan Sawrkar atanga kan thil dawn te kan hman tangkai a ngai a, dik tak leh fel tak, anih dan tur ang taka kan kalpui thiam a pawimawh thu sawiin zirtirtu te chu naupang enkawl kawngah mawhphurhna sang tak an neih thu leh sawrkar in a rawih chhan ang taka naupangte ah thiamna tak tak tuhtu ni turin Zirtirtu te chu a fuih a ni.

Vawiina hun hmannaah zirtirtu kalkhawm te hnenah resource Person thlan bik ten NIPUN Bharat awareness an nei nghal bawk a ni.