2056/2024-2025

Saitual the 13th September, 2024: HIV/AIDS leh mipat hmeichhiatna atanga natna inkaichhawn theih (STI) chungchang inzirtirna beihpui ‘Intensified IEC Campaign - India Fight Against HIV/AIDS & STI’ pualin vawiin khan Saitual Playground-ah hun hman a ni a, Saitual Bawrhsap Dr Lalngura Tlau chu khuallian niin hun a hmanpui.

HIV/AIDS zirtirna beihpui hi kawngzawh (rally) hmanga bul tan a ni a, zirlai naupangte chu Saitual PWD kawnah District Bawrhsap Dr Lalngura Tlau chuan a vai liam a, Keifang Kawn lamah hian Superintendent of Police, Pu Pukhraj Kamal-in a vailiam thung a ni. Saitual Playground-ah hian HIV/AIDS leh STIs lam hawi elocution speech, flash mob dance, placard leh photobooth insiamsiak hmang tein an intihsiak a, College zirlaite chuan HIV/AIDS chungchang inzirtir nan stall hrang hrangte an siam bawk a ni.

Khuallian Dr. Lalngura Tlau chuan vawiina activity hrang hrang kawngzawhte leh intihsiaknate chu HIV/AIDS leh STI chungchanga inzirtirna (awareness) a ni nghal vek a ni a ti a, zirlai naupangte, zirtirtute, thalaite leh nu leh pate hriat tur pawimawh vek a nih thu a sawi. Bawrhsap chuan kawng dik zawh turin mimal duhthlanna a pawimawh ber tih a sawi a, kalkhawmte chu duhthlanna dik siam turin a chah nghal a ni.

He hunah hian Campaign puala intihsiakna hrang hrang buatsaiha lawmman dawngtute hnenah lawmman sem chhuah nghal a ni a, District Bawrhsap Dr Lalngura Tlau leh Superintendent of Police, Pu Pukhraj Kamal te chuan lawmman hi an sem chhuak a. Dr. Zothanpari Chhakchhuak, District AIDS Control Officer chuan lawmthu sawina neiin he hun hi a khar a ni.