1916/2026-2027

Kolasib, 24th August, 2026: Vawiin  khan DC Conference Hall, Kolasib-ah Kolasib Bawrhsap Pu H. Dolianbuaia kaihhruaiin District AIDS Prevention & Control Committee chu an thukhawm a. He hunah hian HIV/AIDS darh zel tur ven leh '3rd Phase Intensified IEC Campaign' kalpui dan tur uluk taka sawiho a ni.

Thutkhawm kaihruaitu Bawrhsap Pu H. Dolianbuaia chuan thu sawiin, HIV hrik darh chak lutuk leh hlauhawm zia a tarlang a. "Tunlaiah phei chuan puitling chauh ni lovin, school level atang pawha kan fimkhur a ngai tawh hle a ni," a ti. Mipuite zinga HIV screening theih tawpa kalpui a pawimawh zia leh inzirtirna (campaign leh awareness) tha taka kalpui a tul thu a sawi a. Kolasib District chu Mizoram pumah pawh HIV/AIDS vei percentage sang pawl kan nih  thu sawiin, "Khawtlang hruaitute leh mipuite kan tanho tlat chuan he natna darh chak lutuk hi kan tihniam thei a ni," tiin kalkhawmte a fuih.

He hunah hian Dr. Ramdinthari , District Aids Control Officer pawhin thu sawiin, India ram pumah 'Mission AIDS Suraksha' hlawhtling taka kalpui mek a nih thu a sawi a. Kolasib-ah HIV kai tura rinhlelh (estimate) atanga NACO in target a pek atangin za zelah 72 (72%) chiah tihhlawhtlin (achieve) a la nih thu a tarlang a. Amaherawhchu, target hrang hrang, a bikin damdawi (ART) la mek leh thil dangah chuan 90% chunglam pelh a nih tawh thu a sawi bawk.

Thutkhawmah hian 3rd Phase Intensified IEC Campaign neih dan tura ruahmannate thlirho a ni a. Hmalak dan turte chu:

Village Level Meeting / Advocacy: Link Worker Scheme (LWS) ten YMA leh VC hruaitute advocacy meeting an neihpui ang a. HIV leh STI natna laka mipuite an lo him (aware) theih nan leh, he campaign hlawhtlinna tur hian khawtlang hruaitute an pawimawh zia inhrilhhriatna hun an hmang ang.

HIV/AIDS Awareness Campaign: District chhunga khaw 25 thlanchhuahah awareness neih a ni ang a. Chung khuate chu - Kawnpui (VC 1, 2, 3, 4, 5), Lungdai, Tuithaveng, Khamrang, Zanlawn, Hortoki Vengchhak, Hortoki Venglai, Thingdawl (VC 1, 2), Bilkhawthlir North, Bilkhawthlir South, Bairabi South, Bairabi North, Meidum, Bualpui, Saipum, Saiphai, Bukvannei, Buhchang, Phainuam leh Rengtekawn te an ni.

Heng khaw 25 thlanchhuahah te hian Mobile ICTC, LWS leh Bike Outreach Worker te tangkawpin HIV leh ruihhlo (drug) laka fihlim turin awareness campaign hi school 39 leh college 2-ah an nei dawn bawk a ni.

Hemi hnu hian Kolasib District chhunga HIV dinhmun tlangpui report ngaihthlak a ni a.

Tarlan a nih angin, tun dinhmunah HIV chungchanga Kolasib District dinhmun chu hetiang hi a ni:

Kolasib district-ah June atanga August 26 chhungin thisen sample test zawng zawng hi 2818 a ni a, heng zingah hian HIV positive mi 31 (1.1%) an awm a ni.

He hun chhung vek hian mipui mimir (General -raipuar tel lovin )test zat 2312 a ni a, HIV positive mi 28 (1.2%) hmuhchhuah an ni.

Mipa test 1421 zingah positive mi 20 (1.4%) an awm a, hmeichhia test 891 zingah positive mi 8 (0.9%) an awm thung.

Nu naupai (ANC) thisen test 506 awmin, an zingah hian HIV positive mi 3 (0.59%) an hmu chhuak a ni.

HIV kaina chhan langsar ber chu mipat hmeichhiatna hman atangin a ni a, hetiang kawnga kai hi mi 19 an awm.

Mipat hmeichhiatna atanga kai zingah hian Non-Commercial emaw Non-Regular partner atanga kai mi 13 an awm a, Regular partner emaw nupa tuak atanga kai mi 5 an awm bawk.

Hriau leh syringe thianghlim lo hman nawn (Infected needle and syringe) atanga HIV kai mi 8 an awm a, nu atanga nautea kai (Parent to child) mi 1 a awm.

April 25 atanga May 26 inkara HIV positive hmuhchhuah tharte kum bithliaha thenin, kum 25 atanga 49 inkar an tam ber a, kum 25-34 inkarah mi 11 leh kum 35-49 inkarah mi 11 bawk an awm.

Hemi hun chhung vek hian kum 15-24 inkarah HIV positive mi 3 an awm a, kum 14 hnuailamah mi 1 awmin, kum 50 chunglamah mi 2 an awm bawk.

June 02 atanga July 26 inkar dinhmun (status) pumpuiah thisen test tawh zawng zawng chu 115494 a ni a, HIV positive mi 2055 (1.8%) an awm a. Raipuar test tawh zawng zawng 41344 zingah positive 149 (0.36%) an awm a ni.

Vawiin thutkhawmah hian Dr. R.K. Lalthlamuana, Sr CMO, Kolasib; Pi B. Malsawmtluangi, Addl. DC, Kolasib; District Medical Superintendent; District Education Officer; SDO (Sadar), Kolasib leh MACS, Kolasib atanga official-te an tel a ni.