1887/2023-2024

2023 Mimkut thla ni 14: Vawiin khan Samagra Shiksha, Kolasib District Project Office leh Science Teachers' Association Mizoram (STAM), Kolasib District te ṭang kawp huaihawtin I&PR Conference Hall, Kolasib-ah "Understanding Ecosystem for Health and Wellbeing" tih thupui hmangin 31st Kolasib District Level Children's Science Congress buatsaih a ni.

Samagra Shiksha, Kolasib District-a Deputy District Project Coordinator Pu R. Lalramhluna kaihhruaia District Level Children's Science Congress hawnna buatsaihah Kolasib District Education Officer, Samagra Shiksha District Project Coordinator ni bawk Pi K. Lalsiamliani chuan hawnna thu a sawi a. Zirna in chhunga zirlaibua mi zir ringawt piah lamah zirnain a ken tel tih tur hrang hrang a awm tih sawiin, zirlaite'n thiamna tluantling an neih theih nan zirnain a ken tel tih tur hrang hrangte chu ngaih pawimawh a ṭul, a ti a. Children's Science Congress chu national level thlenga buatsaih ṭhin a nih thu sawiin, sikul telte chungah lawm thu a sawi a, zirlaite chu District ai awh zo tak ni turin duhsakna a hlan a ni.

He hunah hian Kolasib District Coordinator (CSC) Pu Laldingliana'n technical report a pe a. Kolasib District Level Children’s Science Congress-ah junior scientist (elementary school student)-te project 5 leh senior scientist (secondary school student)-te project 10, a zavaiin project 15 a awm thu a sawi a. CSC buatsaih tur atan hian June ni 8, 2023 khan Kolasib-ah school headmaster leh science teacher-te ko khawmin, Indian Institute of Technology (IIT), Gandhinagar-a Department of Physics-a Assistant Professor Dr Krista Roluahpuia Khiangte resource person-a hmangin CSC 2023 sensitisation workshop buatsaih a lo nih tawh thu a sawi bawk.

Hawnna hun hman zawh hian technical session hman chhunzawm niin, Kolasib District chhunga elementary school 5 aṭanga junior scientist-te'n evaluator-te hmaah an project entirin an sawi fiah a. Evaluator-te'n zawhna an neihte an chhang bawk a. Chawhnu lamah Kolasib District chhunga secondary school 10 aṭanga senior scientist-te'n evaluator-te hmaah an project entirin an sawi fiah ve leh a. Intihsiakna zawh hnuah evaluator-te aṭangin intihsiakna sawi zuina ngaihthlak a ni a. District Academic Coordinator Pu Lalsangliana'n intihsiakna result puangin, DPC Pi K. Lalsiamliani'n lawmman dawngtute hnenah lawmman a hlan a. Dy DPC Pu R. Lalramhluna'n lawm thu sawiin hun a khar a ni.

Kolasib District Level Children's Science Congress 2023 result chu heti ang hi a ni:

1) 1st prize: Govt Diakkawn High School

Scientists: Grace Chanchinmawii (Class-IX) & Gospelmawii (Class-IX)

Guide Teacher: R. Lalthantluangi

2) 2nd prize: Govt High School, Bairabi

Scientists: Laldinkima & Lalzarliana

Guide Teacher: Lalremruata

3) 3rd prize: HT High School, Ṭumpui, Kolasib

Scientists: Sarah Lalrinkimi (Class-X) & Isak Lalditlien Hmar (Class-IX)

Guide Teacher: Lalṭhafala Rokhum

District Level Children's Science Congress-a pakhatna hian ₹ 8,000/- leh certificate, pahnihnain ₹ 6,000/- leh certificate, leh pathumnain ₹ 4,000/- leh certificate an dawng a. School 12 hnenah participation prize ₹ 2,000/- ṭheuh pek an ni bawk.