1886/2023-2024

Hnahthial the 14th September 2023: Deputy Commissioner of State Tax Office, Electric Veng Hnahthial chu vawiin khan Taxation Minister Pu Lalchamliana chuan a hawng a, hawnna inkhawm Horeb Conference Hall, Rallangtlang-a neihah Khuallian niin a hmanpui. Taxation Department Secretary PU H Lianzela chuan hawnna inkhawm hi a kaihruai a ni.

Minister Pu Lalchamliana chuan he hunah hian thu sawiin District tihpuitlinna kawnga pawimawh tak Taxation office hawn a ni ta chu lawmawm a tih thu a sawi a. Hnahthial District chuan district anga a function hnuah kawng hrang hrangin hma a sawn nasa hle tiin Bialtu minister chak leh viak tha tak an nei chu a lawmpui thu a sawi. Khuallian Pu Lalchamliana chuan sorkarin hriat lawk loh leh beisei phak loh harsatna tam tak hmachhawnin duh angin hmalakna chak thei lo mahse hmasawnna tam tak hmuh tur a awm a ti a, tlawmngai pawl leh kohhran inpekna leh thawhrimnaah lawmthu a sawi bawk. Minister chuan Mizote chu Pi Pu hunlai atang tawha chhiah pe thin an ni a ti a, thawkkhat lai atanga engkima sawrkara innghah tumna rilru a piang ta mai chu pawi a tih thu a sawi bawk. Chhungkua, Khua leh Ram zahawm ni tur chuan intodelh a, mahni kutke a din theih a pawimawh hle tiin chumi tur chuan nasa lehzuala tan lak a ngai a ti. Kum kalta a Taxation Department in Sawrkarin chhiah khawn tura a tuk zat a khum chu a lawmawm hle rualin sawrkar budget nen khaikhin erawh chuan a beitham hle a ti bawk. Sawrkar sum hnar 2- Tax revenue leh non- tax revenue a awm thu tarlangin Taxation Department chuan tax revenue mawhphurhna a la a ti a, Non-tax revenue; tui bill, electric bill, stamp fee leh a dangte a ni tiin mipuiin tlawm zawka an hman theih nan sawrkar in sum tamtak sengin subsidy in mipui a pe thin a ti a, chu chu hriatpui a mipuite pawhin chhiah pek lamah tan lak zual a tul hle a ni a ti bawk. Ram a intodelh loh chhung chuan a zahawm thei lo a ti a, mipui pawhin ngaituahna thar nen Taxation Department-te thawhpui thiam turin a chah a ni.

Sawrkar in sum hnar a neih hrang hrang tarlangin Sawrkar laipuiin chhiah a lakluh zawng zawng atanga 0.50% chu Mizoram in a chang a ti a, chu chu Mizoram sum hnar lian ber a nih thu a sawi. Mizoram chuan a mamawh zat za a sawm (10%) chauh a lakluh thu tarlangin chhiah pek chu mipui mawhphurhna a ni hria a, a inhrilhhriat kawngah uar leh zuala inzirtir ngai a tih thu a sawi bawk a ni.

Vawiina Taxation Office hawnna inkhawmah hian Addl Commissioner of State Tax Pu HK Lalhawngliana leh Pu Zaithanmawia Chhangte te chuan inhmelhriattirna neiin Pastor TC Vanlalzuia chuan hunserh a hmang a, Commissioner of State Tax Pu R Zosiamliana’n report pein Hnahthial Addl DC Pu Lalvenhima pawhin thusawi tawi a nei bawk a, Pu Lalnunzira Ralte, Joint Commissioner of State Tax chuan lawmthu sawiin hun tawp a khar a ni.

Mizoram Sorkar hnuaia Taxation Department hi May ni 20, 1988 khan Excise Department atanga indangin, Sorkar tan vawiin ni thleng hian revenue la luttu Department pawimawh ber a ni. Taxation Department hi Commissioner of State Tax kaihruaihna hnuaiah Zone 14 a then a ni a. Aizawl District-ah Zone pali awmin, District dangah Zone pakhat theuh a awm a. Tun hnaiah District thar pathum, Hnahthial, Khawzawl Ieh Saitual-ah te Zone thar siam a ni.

Headquarters Office (Commissionerate) chu Commissioner of State Tax kaihhruaina hnuaiah Additional Commissioner pahnih (2) leh Joint Commissioner pathum (3) an awm a. Deputy Commissioner leh Assistant Commissioner bakah State Tax Officer ten an tawawm a ni. Zonal Office-te chu Deputy Commissioner kaihruaina hnuaiah Assistant Commissioner leh State Tax Office-te an awm thung a ni.

Taxation Department hian kum 2022-2023 chhunga target chu cheng vaibelchhia 900 a ni a, revenue hmuh zawng zawng chu cheng vaibelchhia 1020.66 a ni a, Sawrkar kum kal mek 2023-24 chhung hian August ni 31 thleng khan revenue chu cheng vaibelchhia 492.90 a lut tawh a ni.