3975/2023-2024
2024 Ramtuk thla ni 27: Vawiin khan Kolasib District Task Force on Immunisation (DTFI) chu an Chairman, Kolasib District Bawrhsap Pu John LT Sanga hovin Kolasib DC Conference Hall-ah an ṭhu khawm.
Chairman Pu John LT Sanga chuan hriselna kawnga hma lakna chu a pawimawh hle tih sawiin, inthlahdah leh muanchan vanga nunnain a tuar theih avangin rang taka hma lak zel a ngai tih a sawi a. Hriselna kawnga District-in hma a sawn zel theih nan thawktute hma lakna chu mipuite'n ṭha taka thlawp a, thu awih taka thawhpui a ṭul a ni, a ti.
He hunah hian health department-a thawktute, education, women & child development, UD&PA, RD leh I&PR department ai awhte an tel a. DTFI Secretary, Kolasib District Senior Chief Medical Officer Dr RK Lalthlamuana chuan National Immunisation Day-a zenghri dan beihpui thlak tur chungchang report pein, hemi chungchanga hma lak dan tur hrang hrang sawi ho a ni.
National Immunisation Day (NID) hi March ni 5, 2024 (Thawhlehni) khian Intensified Pulse Polio Immunisation (zenghri dan beihpui thlak)-a hman a ni dawn a. Hemi ni hian naupang kum 5 hnuai lam zawng zawng chu zenghri danna kaa thlawr chi (oral polio vaccine) pek an ni dawn a. Hemi huna hri danna pek tur hi Kolasib District-ah naupang 8,389 target an awm a. March ni 5-ah hian khaw hrang hrangah booth 122, transit 2 leh high risk area (HRA) 9-ah hri danna pek hi kalpui a ni ang a. Hemia pek bakte chu March ni 6 aṭangin in tinah lut chhuakin hri danna hi pek a ni ang.
NID hawnna hun hi March ni 5, 2024 chawhma dar 10:00-ah Kolasib Diakkawnah hman ni se, tih a ni a. Khuallianah District Bawrhsap Pu John LT Sanga chu beisei a ni a. NID hman tur atan hian February ni 28 aṭangin thawktute chu training pek an ni dawn a ni.
March ni 16, 1995 khan National Immunisation Day hi India ramah a vawi khat nan hman niin, zenghri danna pek beihpui thlak ṭan a ni a. March ni 27, 2014 khan World Health Organisation (WHO) chuan India chu zenghri awm tawh lohna ram (polio free)-ah a puang tawh a ni.
January ni 13, 2011-a Howrah, West Bengal-a zenghri vei hmuh chhuah kha India rama zenghri vei hmuh chhuah hnuhnun ber a ni a. Tun thleng hian zenghri ni thei awma rinhlelh chu endik turin hmunpui lamah thawn zel a la ni a. Nikum 2023 chhung khan Kolasib District aṭangin zenghri ni thei awma rinhlelh sample 5 chu Kolkata-ah thawn niin, zenghri a ni lo tih finfiah a ni.
Kum 2022 NID-ah khan Kolasib District-ah zenghri danna pek tur target 8,768 awmin, booth 107, transit 2, HRA 9 leh house to house activity kal tlangin naupang kum 5 hnuai lam 9,121 zenghri danna pek an ni a. Target aia tam (104.02%) hri danna hi pek an ni.
Attachment
- Loading attachment...
