3974/2023-2024

LUNGLEI; the 27th February, 2024: Vawiin chawhma dar 11:00 khan District Horticulture office, Lunglei chuan Mission for Integrated Development of Horticulture( MIDH) atanga Fund an dawn hmangin Agriculture complex, Lunglei Chanmari veng-ah ni 3 chhung awh tur “Horticulture Exhibition-Cum- Fair,2024” a buatsaih a. Bawrhsap Pi Ramdinliani ,IAS chuan khuallian niin, Horticulture Exhibition-cum-Fair,2024 hi ribbon chepchatin a hawng a ni.

Exhibition Cum Fair hawnna inkhawm hi Pu B. Lalzarzova MHS, Dist Horticulture Officer,Lunglei chuan kaihruaiin, thlaithar phochhuahna remchang mai bakah thlai leh Pangpar enkawlna phochhuahna hun remchang mipuite tana tangkai tur ngaihtuaha Exhibition- Cum -Fair hi buatsaih an nih thu a sawi a. Thlai, Pangpar leh thei chi hrang hrang bakah a sawngbawlna leh a enkawlna damdawi thlengin phochhuah a nih thu leh Lunglei Dist chhunga mite ngei phochhuah a nih thu a sawi bawk.

Exhibition- Cum- Fair hawngtu khuallian Pi Ramdinliani chuan thu sawiin, Sawrkarlaipuia kan Nodal Ministry, Ministry of Agriculture and Farmer Welfare chuan India ram hmun tin a tuamchhuak a, angaihna hre tan leh taima tan chuan sum haichhuah tur tam tak a awm a. Lo neitute leh Pangpar chingtute tana hamthatna awm thei te pawh Sawrkara thawktute lam te pawhin hriatzau tum a pawimawh hle a ni, a ti. Tunlai khawvelah mithiam ten damdawi tello a thlai leh thei enkawl an uar tawh em em a, Mizoram pawh Organic State hialah kan inchhal tawh a ni. Organic State anga kan inchhal tawh laiin, thahnemngaih luat vanga Chemical Fertilizer la hmang hi kan lo neitute zingah pawh an la awm nual niin a lang a, mihring kan hrisel zelna tur atan Organic Fertilizer hman kan uar zel a tul hle a ni, a ti.

Khuallian chuan Sawrkar atanga tanpuina chungchangah a petu tur department lamin ti ve tura min phutte tha taka tihhlawhtlin ve hi kan mawhphurhna a ni ti lo neituten kan hriat a tul hle a ni, a ti. A dawn chiah duha mahni tih ve tur buaipui tha peihlo an awm thin chu thil thalo tak a ni a, sawrkar atanga puihna kan duh chuan sawrkarin tive tura min phut tha taka tihhlawhtlin hi kan mawhphurhna a ni. Khawvel hmun dangte chauh a awm thei tur leh kan rama awm ve theilo emaw kan tih thin Pangpar leh thlai chi tam tak kan ramah ngei kan tharin kan ching thei tih a takin vawiin exhibition-cum- Fair-ah pawh hian ka hmu a, ka lawm hle a ni.Kan ti tak taka kan tum tak tak a nih chuan miramah chauh emaw an neih kan tih tam tak hi kan ramah hian a tha duh em em a ni tih kan hriat a, hnamdang ten an tih theih chu kan ti thei a ni tih rilru puin hmasawn zel i tum ang u, tiin Exhibition-cum-Fair chhimtu te a chah hlawm.

Nl.Liansangpuii Pachuau, Dist Horticulture Consultant in report a pek danin Horticulture Exhibition- Cum- Fair,2024-ah hian mi 160 chuangin thlaithar, thei, Pangpar leh thlai enkawlna hmanrua leh damdawi te an phochhuak a, Exhibition bikah hian mi 12 ten item hrang hrangah inelna neiin, a titha pakhatna atanga pathumna te hnenah lawmman pek an nih dawn bakah Exhibition a tel zawng zawngte hnenah Participatory Prize pek vek an ni ang, a ti.

Pu C.Lalnunmawia, Sr.HD chuan lawmthu sawinain  vawiin Horticulture  Exhition-cum-Fair, 2024 hawnna inkhawm tawi hi a khar ta a ni.