2636/2023-2024

2023 Sahmulphah thla ni 3: Mizoram Legislative Assembly Inthlanpui, 2023 lo awm tur atana Kolasib District chhunga assembly bial pathum - 4-Tuirial, 5-Kolasib leh 6-Serlui biala inthlan nia venhimna hna thawk tur, security duty turte tan vawiin khan Kolasib Diakkawn YMA Hall-ah thil pawimawh inhrilhfiahna (briefing) buatsaih a ni.

He briefing-ah hian Kolasib District Sr Superintendent of Police Pu Lalrinawma Traite chuan hun hmanpuiin, security duty tura ruatte chu an mawhphurhnate ṭha taka hlen chhuah tum turin a chah a. Inthlan chu mipui rorelna dinna kawnga rahbi pawimawh ber pakhat a nih avangin lak urhsun a ṭul hle tih sawiin, sawisel bova inthlan buatsaih a nih theih nan venhimna hna chu a pawimawh hle a, fimkhur leh uluk taka thawh a ṭul a ni, a ti.

He briefing-ah hian Kolasib District-a election security incharge-te'n security duty-te tana hriat tur pawimawh hrang hrang an zirtir a. Zawhna leh chhanna leh sawi hona hun hman ni bawkin, briefing neih zawhah SP Conference Hall-a postal ballot vote thlakna tur facilitation centre buatsaihah election security duty turte hian postal ballot-in vote an thlak nghal a ni.

Kolasib District chhunga assembly bial pathumah polling station 89 awmin, polling station tinah hian security personnel pahnih zel an duty dawn a. District chhunga venhimna uluk ngai zual (critical) polling station 7 bikah chuan Central Armed Police Force aṭangin security personnel 10 zel an duty dawn thung a ni.