Vawiin khan Kolasib-a Brig. C. Vankunga Shopping Centre Conference Hall-ah Faina Hapta  a ni, UD&PA Department changtu Parliamentary Secretary Pu S. Laldingliana’n he hun hi a hmanpui a ni.

Pu H. Lalengsanga, Chairman, Joint VC Kolasib chuan inkhawm hi a kaihruai a. Khuallian Pu S. Laldingliana chuan thu sawiin, kristianna leh faina hi thil kal kawp tlat a nih avangin kan uar sauh sauh tur a ni, a ti a. A week chu khar ni mahse kan thinlungah Faina hi vawng chungin kalpui reng ang u, a ti a,  India ram state 28 zingah kan tan tan zel chuan Mizoram hi Fai ber kan ni theia a rin thu pawh a sawi a ni. Pu Dingliana chuan DUDO hmalakna a khaw thianghlimna Solid Waste Management Project kalpui tum mek a nih thu sawiin Kolasib chu mithiam officer in Department a thutchilh avanga an vannei hle thu a sawi a. Department kaltlanga mirethei In sak sakna Pilot Project (thawh hma sakna khua) an nih avanga an vanneih zia pawh mipui ten kan hriat a tul a ni, a ti. Sawrkar hmalakna te hi mipui tan liau liau a nih avangin kawng engkimah sawrkar i tawiawm ang u, a ti a ni.

Pu Andrew Lalhruaia, DUDO chuan report pe in week chhungin Kolasib khaw chhunga VC theih hnenah pawisa Rs. 10,000/- theuh pek a nih bakah Civil SDO thuthmun pahnihah te Rs. 5,000/- ve ve pek an niin Faina kawnga inzirtirna leh ngenna zau taka neih a ni, a ti a. Week pual hian October 5 khan St. John HSS ah Solid Waste Management chungchang zirtirna pek a ni a ti bawk.

Week chhung hian Veng fai endikna neih a ni a. Endikna point hrang hrangte Dr. Lalthuamliana, CMO chuan sawiin result a puang a. Veng fai bera thlan chhuah College veng hnenah Certificate leh Rs. 3,000/- Khuallian nupui Pi Lily Pari Sailo chuan a hlan a. 2nd Project veng hnenah Rs. 2,000/- leh Certificate leh 3na Tumpui Veng hnenah Rs. 1,000/- leh certificate a hlan bawk a ni.