Vawiin chawhnu dar hnih khan Serchhip DC’s Meeting Room-ah chu NLUP thawh hnihna (2nd Phase) atana beneficiary te thlan dan tur leh thil pawimawh dang ngaihtuahin Serchhip District-Level NLUP Implementing Committee chu an Chairman, District Bawrhsap Pu P.Lalchhuanga hovin an thukhawm.

NLUP 2nd Phase atan hian Serchhip District huam chhunga MLA Constituency 3 atangin beneficiary 3050 thlan tura ruahman a ni a, Hrangturzo Constituency atangin chhungkaw 1000, Tuikum Constituency atangin chhungkaw 1050 leh Serchhip Constituency atangin chhungkaw 1000 thlan chhuah tur an ni a, hemi atana hmalak dan turte relin Village Level Implementing Committee te leh Village Council te mawhphurhna te ngaihtuah a ni a, khaw hrang hrang a NLUP tanpuina sum dawng tur te semzai dan tur ruahman a ni a, dik leh felfai thei ang bera beneficiary te thlan an nih theih nan District Level Implementing Committee aiawh te leh Line Department hrang hrangte pawhin theihtawp chhuah a tha seng turin an in fuih a, khaw tina beneficiary thlanna ah official leh non-official aiawh ten telpui vek ni se tiin an rel a ni.

NLUP thawh hnihna atana Trade thlan dan tur chungchang pawh ngaihtuah niin Line Department tin ten an inpuahchah dan report an pe a, Trade thlan tawh hnu a thlak nawn leh a awm tawh loh nana hma lak dan tur leh inzirtirna kalpui dan tur te pawh ngaihtuah nghal ni in, hemi chungchanga Village Level leh District Implementing Committee te leh Line department te tih tur leh mawhphurhna te sawiho nghal a ni bawk.

NLUP thawh hnihna tanpuina sum dawng tura thlanchhuahte hming (Beneficiaries list) hi October ni 31, 2011 ral hma in Serchhip Bawrhsap pisa-ah thehluh tur a ni a, Trade thlan pawh hi November ni 28, 2011 ral hma a tihfel vek tura ruahman a ni.