Vawiin chawhnu khan Kolasib-ah Fire Prevention Week 2014 hawn a nita a. Week hi hawngin Minor Irrigation Minister Pu Lal Thanzara chuan, ‘ Ram kang hian thing leh mau a tirem chang a ni lova, nungcha a ti chereu va, boruak chhia nasa takin a siam a ni,’ a ti.

Week hawnna inkhawm, Govt. Kolasib College Hall-a neihah hian Pu Lal Thanzara chuan, ram tikang lo turin mitin tang tlang ila, Tlawmngai pawl zawng zawngte pawhin a tharin tan i la ang u, a ti. Ram kang hi mihringte khawsak nan a pawi hle a. Keimah nina kan siam chawp thin ram kang hian kan chenna boruak sik leh sa a sawisa a, nungcha te a tithi a, ramin a chhiatpui hle a ni, a ti a. VC leh tlawmngai pawl dangten khua alo thal hian hah takin ram in veng thin a, in chungah pawh sawrkar aiawhin lawmthu ka sawi a ni, Pu Lal Thanzara chuan a ti a. NLUP avangin chhungkaw engemawzat chuan kum tina ram hala Lo an neih thin an titawp a. Hei hian ram kang a tih tlem phah hle tih Deptt. mite chuan an zir chhuak a, a lawmawm hle a ni, a ti.

Kolasib leh Kawnpui inkar kawngpui chhe lutuk tunhnaia NGO ten sawrkara an thlen chungchang sawiin, hei hi Tender te koh a ni a, tun thal chhung ngei hian siam a ni ang , Minister chuan a ti a. Pawisawilo rikrap a, tun hnaia Bomb tipuaktute chu sawrkarin a zawng chhuak ngei dawn a. Muanna tichhe zawnga kawhmawh bawlte kan zavaiin i dovin anmahni man chhuah kawngah i tang tlang ang u, a ti bawk a ni.

Kolasib DC & Chairman, Fire Prevention Committee Pu Jitender Yadav, IAS chuan inkhawm hi a kaihruai a. Pu Lalthlamuana, IFS, DFO & Member Secy chuan report a pe a. Pu HF Sena, Secy, MUP Dist Hqrs chuan thu a sawi bawk.

Kolasib District Fire Prevention Committee chuan ram kang veng tur hian nasa lehzuala tan lak nise an ti a. Khaw tinah zirtirna ngawrh taka neiin School ah te, ni 100 inhlawhnaah te, Tlawmngai pawl hrang hrang punkhawmnaahte campaign hi an nei dawn a. Lo hal hun chhunga hal lote chu VC ten hremna pe ngei se an ti bawk a. Kum danga tih thin angin Ram kang veng tha khua te hnenah lawmman tha tak pek leh nise an ti bawk a ni.

Pu Lalrinawma, MCS, DLAO –in lawmthu sawiin inkhawm hi tihtawp a ni.