Health & Family Welfare Minister Pu Lal Thanzara’n vawiin khan Govt. Kolasib College-ah MPSC Examination Centre a hawng.

Thu sawiin Pu Lal Thanzara chuan an party Manifesto-a an tiam ang ngeia MPSC Centre hawn theih a nita chu Kolasib tan malsawmna ropui tak a ni, a ti a. Khaw mipui ten mahni kawtkai ngeia Exam pawimawh tak tak an hma chhawn thei tur chuan Economic lama intodelhna ropui tak a thlen ngei ka ring a ni, a ti. Kan sawrkar chuan thalaite hmakhua te, an zirna chungchang te a ngai pawimawh hle a ni, a ti a, an term hmasa-a Education Reforms Commission-in sawrkara report a thehluh pawh tunah hian bawhzui a niin zirna kawnga thawm that ngaite thawm thaa hma lak tan mek a ni, Pu Lal Thanzara chuan a ti a. Mizo thalaite chu Competitive Exam lama harh thar tul a tih thu leh Central lama hna tam tak awmte chuh ve tul a tih thu sawiin, hmar chhak state danga mite pawh hna sang leh sanglovah pawh hetih kawngah hian an pen chak hle a ni, a ti. Tunah chuan kan Mizo thalai infiam mite pawh All India ah an challang ta hle a,India Football chanchinah phei chuan Mizo hming tellovin a sawi theih ta meuh lova ni, a ti a. Kan infiammi feh chhuak tehi Medal la lovin an rawn haw ta mang lo a ni, tiin hetih kawngah pawh hian tan i la thar zel ang u, a ti bawk a ni.

Pu Andrew Lalherliana, Member, MPSC chuan thu sawiin he Exam Centre atang hian sawrkar-ah khawtual mi thiam tak tak sawrkarah anla lut dawn a ni, a ti a. Centre tha leh dik kan neih theih nan khawtual mi te, NGO te in tan hle a ngai dawn a ni, a ti a. Vawiin ni thleng hian MPSC hian Exam tamtak a buatsaih tawhah hminghliauna a nei lova, hei hi kan ram hruaitute kan CM leh Cabinet te atanga a eng zawng maha inrawlhna a awm loh vang a ni a, ka lawm takzet a ni, Pu Andrew chuan a ti a ni.

Thu sawitu dang Pu Jitender Yadav, DC Kolasib chuan Kolasib-a MPSC Exam Centre hi District chhunga thalaite, Aizawl pan nana sum tamtak sen tur nei lote tan vanneihna a ni dawn a ni, a ti a. Chutih mek lai chuan State sawrkar pawhin khaw chengker tak taka mi thate a hnuaia thawk tur a zawn hmuhna tur hmanrua a ni dawn bawk a ni, a ti a. Mizoram MPSC chu mite rin leh ngaihsan a nih avangte, Kolasib a Centre din tura an thawhrimna te avangin lawmthu a hrilh a ni.

Pu Tamlal Lohar, Secy, MPSC chuan report a pe a. Pu Lalduhawma, Principal, Govt. Kolasib College chuan Centre hawnna inkhawm hi a kaihruai a, Pi K. Vanlalruati, SDO (S) in lawmthu sawiin inkhawm hi a tin a ni.

Attachment

  • Loading attachment...